भक्तपुर, २० पुस गत असोजमा सम्पन्न शिक्षक अध्यापन अनुमति पत्र (लाइसेन्स) परीक्षाको परीक्षाफल माघमा आउने पक्का भएको छ । सानोठिमीस्थित शिक्षक सेवा आयोगले आउदो माघको १५ गते भित्र नै नतिजा प्रकाशित गर्ने तयारीका साथ काम भैरहेको जनाएको हो ।
गत असोजमा सम्पन्न शिक्षक अध्यापन अनुमति पत्र (लाइसेन्स) को परीक्षामा प्राविका लागि ६६ हजार ५ सय ९५, निमाविका लागि ५६ हजार १ सय ४० र माविका लागि १ लाख १ हजार ९ सय ९० परीक्षार्थी सहभागी भएका थिए । उनीहरुमध्ये प्राविको मात्र कापी जाँच्न शुरु भएको छैन ।
”अहिले निम्न माध्यमिक र माध्यमिक तहको कापी धमाधम परिक्षण भइरहेको छ । केही दिन भित्रै प्राथमिक तहको पनि कापी परिक्षण शुरु गरिनेछ । माघ १५ भित्र नतिजा सार्वजनिक गर्ने तयारीका साथ काम भइरहेको छ ।” आयोगका प्रशासकीय प्रमुख बैकुण्ठप्रसाद अर्यालले भने ।
काठमाडौंमा २ र ललितपुरमा २ गरी ४ परिक्षण केन्द्रमा धमाधम कापी जाँच्ने काम गरिरहेको उनको भनाइ छ । जाडो बिदामा थप शिक्षकहरु परिचालित हुने काम द्रुत गतिमा अघि बढ्ने आयोगका प्रशासकीय प्रमुख अर्यालले विस्वास व्यक्त गरे ।
यसअघि काठमाडौंको कालिमाटीस्थित जनप्रभात मावि र ललितपुरको बालकुमारी स्थित गम्भिर समुन्द्र सेतु मावि गरी २ वटा परिक्षण केन्द्रमा कापी परिक्षण भइरहेकामा अहिले काठमाडौंको रत्नराज्य मावि बानेश्वर र ललितपुरको टीका विद्याश्रम सानेपा गरी २ केन्द्र थपेर धमाधम कापी परीक्षण भइरहेको हो ।
आयोगले बस्तुगत तर्फको कापी मेसिनबाट र विषयगत तर्फको कापी पूर्व प्राध्यापक/शिक्षक तथा कर्मचारीहरुबाट परिक्षण गरिरहेको बताइएको छ ।