भक्तपुर, १९ माघभक्तपुर प्रहरीले अपहरणमा परेकी एक बालिकालाई सकुशल उद्धार गर्न सफल भएको छ । मध्यपुर थिमिको निकोसेरा स्थित आफ्नै विद्यालयबाट अपहरणमा परेकी ६ वर्षकी बालिकालाई प्रहरीले सकुशल उद्धार गर्न सफल भएको हो ।
निकोसेरा स्थित एक निजी विद्यालयमा युकेजीमा पढ्ने एक छ वर्षकी बालिका आइतबार करिब १२ बजे अपहरणमा परेकी थिइन् । आफन्त भन्ने ठानेर विद्यालय प्रशासनले अपहरणकारीलाई बालिका सुम्पिदिएको थियो । बालिका अपहरणमा परेको तब थाहा भयो जब बालिकाको बाबुसंग १६ लाख फिरौती मागियो ।
महानगरीय प्रहरी परिसर भक्तपुरका डीएसपी दिपक गिरीले जनाए अनुसार १६ लाख फिरौती माग गरि बालिका अपहरण गरेको खबर प्राप्त हुनासाथ जिल्लामा व्यापक प्रहरी तैनाथ गरियो । महानगरीय अपराध महाशाखालाई पनि तत्काल खबर गरि संयुक्त प्रहरी टोलीले खोज्दै जाने क्रममा सूर्यविनायक -७ स्थित घ्याम्पेडाडामा बालिका सकुसल फेला पारिएको परिसरका डीएसपी गिरीले पुष्टि गरे ।
डिएसपी गिरीका अनुसार बालिका अपहरणमा संलग्न एक अपहरणकारी पक्राउ समेत परेका छन् । पक्राउ पर्नेमा सर्लाहीको लालबन्दी -५ स्थायी घर भै मध्यपुर थिमी -६ बस्ने २० वर्षको आशिष थापा रहेका छन् ।
उनी अपहरित बालिकाको नजिकको आफन्त रहेको प्रहरीको प्रारम्भिक अनुसन्धानबाट खुलेको बताइएको छ । अपहरणकारीमाथि थप अनुसन्धान भैरहेको भन्दै परिसरले विस्तृत विवरण पछि सार्वजनिक गर्ने बताएको छ ।