२ फागुन २०७६भक्तपुर । चीनबाट फर्कने नेपालीहरुका लागि क्वारेन्टाइनमा राख्ने विषयलाई लिएर नगरकोटमा स्थानीयवासी र प्रहरीबीच झडप भएको छ । स्थानीयहरुले ढुंगामुढा गरेपछि प्रहरीले लाठी चार्ज गरेको हो । झडपमा दुवैतर्फ सामान्य घाइते भएको बताइएको छ ।
चीनमा रहेका नेपालीको उद्धारका लागि जाने नेपाल वायुसेवा निगमको विमानका चालक दलका सदस्य र स्वास्थ्यकर्मीलाई राख्न नगरकोटमा क्वारेन्टाइन बनाउने सरकारको योजना छ ।
सरकारले चीनको वुहानमा रहेको नेपालीको उद्धारका लागि जाने चालक दलका सदस्य र स्वास्थ्यकर्मीलाई चाँगुनारायण नगरपालिका वडा नं. ६ नगरकोटस्थित राष्ट्रिय खानेपानी तथा सरसफाई प्रशिक्षक केन्द्रमा क्वारेन्टाइनमा राख्ने निर्णय गरेको थियो । सरकारको सो निर्णयको विरोधमा स्थानीयहरुले केही दिनदेखि सो क्षेत्रमा प्रदर्शन गरिरहेका थिए ।
शुक्रबार प्रधानमन्त्री कार्यालयका सचिव नारायणप्रसाद बिडारी नेतृत्वको टोली नगरकोट पुगेको थियो । टोली अनुगमन तथा निरीक्षणका लागि आउने थाहा पाएपछि स्थानीयहरुले यातायातसमेत अवरुद्ध गरेर सडकमा टायर बालेर प्रदर्शन गरिरहेका थिए ।
सडकमा भएको अवरोध हटाउने क्रममा झडप भएको हो । सरकारी टोलीमाथि स्थानीयहरुले ढुंगामुढा गरेपछि प्रहरीले लाठी चार्ज गरेको थियो । झडपमा दुवैतर्फ सामान्य घाइते भएको एक स्थानीयले बताए । महानगरीय प्रहरी परीसर भक्तपुरका प्रमुख रहेका प्रहरी उपरीक्षक सविन प्रधानले उक्त क्षेत्रमा टायर बालेर प्रदर्शन गरिरहेका स्थानीयलाई हटाएको पुष्टी गरे । उक्त क्षेत्रको अहिलेको अवस्था सामान्य रहेको उनको भनाइ छ ।
स्थानीयहरुले कोराना प्रभावितहरुलाई बस्तीको बीचमा नराख्न माग गर्दै प्रदर्शन गरेका हुन् ।