भक्तपुर, ३ फागुन प्रधानमन्त्री केपी शर्मा ओलीले कोरोना भाइरस प्रभावित चीनको वुहान क्षेत्रबाट उद्धार गरि नेपाल ल्याउन लागेका नेपालीलाई भक्तपुर राख्नुपर्ने कारण खुलासा गरेका छन् । उनले भक्तपुर आफ्नो जिल्ला भएका कारण भक्तपुरमा राख्न लागिएको बताएका हुन् ।
शनिवार संसदलाई सम्बोधन गर्दै उनले भने, ”७७ जिल्ला मध्ये एउटामा त राख्न पर्यो ? कसैले आफ्नोमा राखौ नभन्ने । त्यसैले मैले मेरै जिल्लामा राख्ने निर्णय लिए । भक्तपुर मेरो पनि गृह जिल्ला हो ।”
उनले बिरामीलाई नेपाल नल्याइएको बताउदै त्यैपनि बाटोमा संक्रमण भए/नभएको यकिन गर्न क्वारेन्टाइनमा राख्ने व्यवस्था मिलाइएको जानकारी गराए ।
संसदमा भक्तपुरका निर्वाचन क्षेत्र नम्बर १ का सांसद प्रेम सुवालले उपत्यका बाहिर नराखी भक्तपुरमा उनीहरुलाई राख्नुका कारण सोधेका थिए । उनको प्रश्नको जवाफ दिंदै प्रधानमन्त्री ओलीले भने ” डाक्टर र मेडिकल सुविधा सम्पन्न ठाउँ आवश्यक भएकोले उपत्यका बाहिर निर्जन जंगलमा राख्न नसकिएको हो ।”