भक्तपुर, ३ फागुन नेमकिपा सचिव समेत रहेका प्रतिनिधि सभाका सांसद प्रेम सुवालले प्रधानमन्त्रीलाई ठगहरुले घेरेको बताएका छन् । प्रधानमन्त्री केपी शर्मा ओली ठगहरुको चंगुलमा परेको उनको भनाइ छ ।
शनिवार प्रम ओलीले आफ्नो दुई वर्षे कार्य समिक्षा संसदमा सुनाएपछि बोलेका सांसद सुवालले शहिदका आमाहरुको हवाला दिंदै नेताहरु ठेकेदार, डोजर टिपर मालिक भएर पैसा कमाइरहेको र ३ करोडमा २ करोड आफ्नै खल्तीमा राखिरहेको सुनाए । उनले सोही क्रममा प्रधानमन्त्री ठगहरुकै घेरा भित्र रमाइरहेकाले फेरी लडाई होला जस्तो लागेको बताए ।
उनले भक्तपुरका जनताको भनाइ राख्दै संसदमा भक्तपुरमा कोरोना भाइरसको क्वारेन्टाइन स्थल बनाउनु र नगरकोट सडक नबनाउनु भक्तपुरको पर्यटन समाप्त पार्नु भएको भनेका छन् । त्यतिमात्र होइन, यो कार्य स्थानीय जनतालाई भगाउनु भएको समेत उनको भनाइ छ । उक्त क्रममा उनले राजधानीलाई काठमाडौ उपत्यका बाहिर लानुपर्ने आवस्यकता समेत औल्याएका थिए ।
सांसद सुवालको प्रश्नको उत्तर दिंदै प्रधानमन्त्री ओलीले संसदमा भने, ”क्वारेन्टाइन स्थल ७७ जिल्ला मध्ये एउटामा त राख्न पर्यो ? कसैले आफ्नोमा राखौ नभन्ने । त्यसैले मैले मेरै जिल्लामा राख्ने निर्णय लिए । भक्तपुर मेरो पनि गृह जिल्ला हो ।”
उनले बिरामीलाई नेपाल नल्याइएको बताउदै त्यैपनि बाटोमा संक्रमण भए/नभएको यकिन गर्न क्वारेन्टाइनमा राख्ने व्यवस्था मिलाइएको जानकारी गराए । सांसद सुवालको अन्य प्रसंगमा भने प्रम ओलीले उत्तर दिएनन । संसदमा सांसद सुवाल बोलिरहँदा प्रम ओली गम्भीरतापूर्वक सुनिरहेका देखिन्थे ।