भक्तपुर, ३ फागुन सरकारले कोरोना भाइरस (कोभिड १९) को संक्रमण भएमा उपचार गर्न उपत्यकामा बिभिन्न ठाउँमा आइसोलेसन सेन्टर बनाउनुका साथै १ हजार आइसोलेसन बेड तयार पार्ने भएको छ । त्यसमध्ये भक्तपुरमा २ ठाउँमा आइसोलेसन सेन्टर र २ सय ८० बेड बनाउने तयारी भएको छ ।
कोरोना भाइरस (कोभिड १९) को संक्रमण रोकथाम तथा नियन्त्रणसम्बन्धी उच्चस्तरीय समन्वय समितिको सोमबार बसेको बैठकले उक्त निर्णय गरेको हो ।
प्राप्त सूचना अनुसार यस अघि क्वारेन्टाइन बनाइएको खरीपाटीस्थित नेपाल विद्युत प्राधिकरणको तालिम केन्द्र र नगरकोटस्थित राष्ट्रिय खानेपानी तथा सरसफाई प्रशिक्षक केन्द्रमा आइसोलेसन सेन्टर बनाउने निर्णय गरिएको छ । खरीपाटीस्थित नेपाल विद्युत प्राधिकरणको तालिम केन्द्रमा २ सय २० आइसुलेसन बेड बनाउने र नगरकोटस्थित राष्ट्रिय खानेपानी तथा सरसफाई प्रशिक्षक केन्द्रमा ६० बेड बनाउने निर्णय गरिएको बताइएको छ ।
बैठकले उपत्यकामा नेपाल प्रहरी र सशस्त्र प्रहरीको अस्पताल, कीर्तिपुर आयुर्वेदिक अस्पताल, टेकु अस्पताल, पाटन अस्पताल र इचंगुनाराणस्थित सुकुम्बासी आवासमा समेत आइसोलेसन् सेन्टर कायम गरी बेडहरु व्यवस्था गर्ने निर्णय गरेको जानकारी प्राप्त भएको छ । त्यसैगरी सरकारले कोरानाका सम्भावित विरामीलाई लक्षित गरी उपत्यकामा १ सय बढी आईसीयू बेड तयार पार्ने समेत निर्णय गरेको बताइएको छ ।