भक्तपुर, १० चैत कोरोना भाइरस(कोभिड १९)को संक्रमणबाट बच्न संघीय सरकारले लक डाउन गर्ने निर्णय गरेसंगै भक्तपुरका स्थानीय सरकारका जनप्रतिनिधिहरु पनि संक्रमण जोखिम प्रति सचेत देखिएका छन् ।
सूर्यविनायक नगरपालिकाका केहि वडाहरुले आफ्ना वडा भित्र कोभिड १९ संक्रमणमा परेका देशबाट कोही आएका भए जानकारी गराउन सार्वजनिक सूचना नै जारी गरेका छन् । सोमबार वडा नम्बर ७ गुन्डूका वडा अध्यक्ष रविन्द्र सापकोटाद्वारा जारी सूचनामा कोभिड १९ संक्रमणमा परेका देशबाट २ हप्ता भित्र कोही आएर वडा भित्र बसेको जानकारी भए सूचित गर्न भनिएको छ । सूचनामा सापकोटाले आफ्नो, वडा सचिवको र स्वास्थ्य चौकी प्रमुखको मोबाइल नम्बर नै उपलब्ध गराई जानकारी गराउन अनुरोध गरेका हुन् । त्यतिमात्र होइन, उनले आफू सुरक्षित रहन र अरुलाई पनि सुरक्षित राख्न वडावासीलाई अपिल समेत गरेका छन् ।
सोमबार सूर्यविनायक नगरपालिकाकै वडा नम्बर १० चित्तपोलले पनि सार्वजनिक सूचना जारी गर्दै कोभिड १९ संक्रमणमा परेका देशबाट कोही आएका भए जानकारी गराउन अनुरोध गरेको छ । वडा अध्यक्ष शिवराम राउतले एक सूचना जारी गर्दै उक्त अनुरोध गरे ।
फ्रान्स बाट चैत पाँच गते काठमाडौं आएकी एक १९ वर्षिय युवतीमा कोरोना भाइरस संक्रमण पुष्टि भएपछि सूर्यविनायकका वडा अध्यक्षहरु आफ्ना वडामा सम्भावित संक्रमण नहोस् भन्ने कुरामा सचेत देखिएका हुन् ।
हेर्नुस् सूचना
