सूर्यविनायक,१२ चैतअरनिको राजमार्ग अन्तर्गत सूर्यविनायक ८ जगातीस्थित बस पकेट नजिकै सवारी दुर्घटना हुँदा एकको ज्यान गएको छ भने दुईजना घाइते भएका छन् । देश लक डाउनमै रहेको बेला यात्रामा रहेका ३ जना दुर्घटनामा पर्दा मोटरसाइकल चालकको मृत्यु भएको हो ।
तेल सकिएपछि रोकी राखेको ना ६ ख ११०३ नं को ट्रकलाई मंगलवार राती मोटरसाइकलले पछाडी बाट टक्कर दिंदा उक्त दुर्घटना भएको प्रहरीको भनाइ छ ।
प्रहरीका अनुसार दुर्घटनामा परी ज्यान गुमाउनेमा सिन्धुपाल्चोकको जुगल गाउँपालिका. घर भई हाल भक्तपुरको कमलबिनायक बस्ने बर्ष २८ को उत्तर ब.तामाङ रहेका छन् । गएराती करिब सवा ९ बजे दुर्घटना पछि घाइते भएका उनलाई प्रहरीले उद्धार गरी इवामुरा अस्पताल पुर्याएको थियो । राती करिब ९ : ३५ बजेको समयमा अस्पतालले उनलाई मृत घोषित गरिदिएको डीएसपी दिपक गिरीले जानकारी दिए ।
डीएसपी गिरीका अनुसार सूर्यबिनायकबाट जादै गरेको बा ९० प ४०४० नं को मोटरसाइकलले ट्रकलाई पछाडीबाट ठक्कर दिंदा मोटरसाइकलमा सवार जुगल गाउँपालिका नै घर भई हाल कमलविनायक बस्ने वर्ष २८ को आकाश तामाङ गम्भीर घाइते भएका छन् । उनलाई इवामुराबाट राती नै केएमसी अस्पताल रिफर गरिएको छ भने ११ वर्षिया कोलसङ डोल्मा तामाङ उपचार पश्चात राती नै डिस्चार्ज भैसकेकी छन् ।
देश लक् डाउनमा रहेका बेला उनीहरु किन बाहिर निस्किए भन्ने बारे थाहाँ हुन सकेको छैन । बाटो खाली भएका कारण तीब्र गति लिंदा रोकिराखेको ट्रकमा ठोक्किन पुगेको प्रहरीको आशंका छ । दुवै सवारी साधन र ट्रक चालक चितवनको भरतपुर १६ बस्ने वर्ष २६ को दुर्गा ब तामाङलाई महानगरीय प्रहरी वृत जगातीले नियन्त्रणमा लिई थप अनुसन्धान कार्य भईरहेको महानगरीय प्रहरी परिसर भक्तपुरले जनाएको छ ।