विश्वव्यापी महामारीको रुप लिएको कोरोनो भाइरस (कोभिड १९) संग मिल्दोजुल्दो लक्षण देखिएपछि भक्तपुर अस्पतालले एक बिरामीलाई रिफर गरेको छ । शंकास्पद बिरामीलाई बुधवार काठमाडौको टेकुस्थित शुक्रराज ट्रपिकल तथा सरुवा रोग अस्पताल रिफर गरिएको हो ।

भक्तपुर अस्पताल आएका एक पचहत्तर वर्षिय जेष्ठ नागरीकमा कोभिड १९ संग मिल्दोजुल्दो लक्षण देखिएपछि उनलाई टेकु पठाइएको अस्पताल श्रोतले भक्तपुर पोस्टसंग भन्यो । साँझ उनलाई टेकु पठाइएको हो । शंका मात्र भएकोले आत्तिन पर्ने अवस्था नरहेको बताइएको छ । अस्पतालले यसको औपचारिक जानकारी गराएको भने छैन ।

नेपालमा हालसम्म ३ जनामा कोरोना भाइरसको संक्रमण पुष्टि भएको छ । पहिलो संक्रमित व्यक्ति चीन बाट फर्केका विद्यार्थी रहेका थिए । उनलाई सन्चो भैसकेको छ भने चैत पाँचमा फ्रान्सबाट काठमाडौ आएकी एक १९ वर्षिया युवती र चैत ६ गते अरबबाट आएका धादिङ्का ३३ वर्षिय एक युवकमा कोरोना पोजेटिभ देखिएको छ । उनीहरु ढिला अस्पताल पुगेकाले थप संक्रमणको आशंका गरिएको छ । हाल उनीहरु टेकुमै उपचाररत रहेका छन् ।