वर्तमान कम्युनिष्ट सरकारले लकडाउनको संकटमा तल्लो वर्गलाई राहत दिनुपर्ने सत्तारुढ दल नेपाल कम्युनिष्ट पार्टीका भक्तपुर जिल्ला सचिव डीपी ढकालले सुझाव दिएका छन् ।

सरकारले चैत ११ देखि गरेको बन्दाबन्दी (लकडाउन) को आदेश पछि गरीब घरपरिवारमा अर्को विपत्ति आएको उनको भनाइ छ । ” कोभिड १९ को अन्तराष्ट्रिय विपत्ति त छदैछ । गरीबहरुको घरको चुल्हो नबल्ने स्थिति नहोस् भन्नेमासमेत सरकारले बेलैमा सोच्नुपर्छ।” भक्तपुर पोस्टसंग उनले भने ।

नेकपा भक्तपुर जिल्ला कमिटीका सचिव समेत रहेका अर्थराजनीतिका लेखक एवं विश्लेषक बौद्धिक युवा नेता ढकालले तल्लो वर्गमा उत्पन्न समस्याको समाधानको लागि सरकारले वडा मार्फत घरघरमा उधारोमा न्युनतम आवस्यक खाद्यान्न र पैसा समेत उपलब्ध गराउन सुझाव दिएका छन् । प्रत्येक वडा कार्यालय मार्फत प्रत्येक परिवारमा न्युनतम आवस्यकताका बस्तु पुर्याउदा जनतालाई राहत हुने र सरकारप्रति नागरिकको सहानुभुती रहने उनको ठम्याई छ ।

युवा नेता ढकालले १ बोरा चामल, ५ केजि दाल, २ केजि गेडागुडी २ केजि चिनी ,१ केजि मस्यौरा, १ लिटर तेल, ५ केजि च्युरा, १ किलो नुन, १ विधुतिय हिटर वा ग्यास र केहि साबुनकोसमेत प्याकेट बनाएर घरघरमा उधारोमा बाढ्नुपर्ने बताए । त्यतिमात्र होइन, विपतको अवस्थामा अत्यावस्यक औषधी उपचार लगायत खर्च हुनसक्ने हुँदा पाँच हजार ऋण उपलब्ध गराउन समेत सरकार समक्ष उनले अनुरोध गरेका छन् ।

यति गर्न सके धेरै हद सम्म जनजीविकाको समस्या समाधान हुन्छ,सक्नेले लक डाउन पछि तिर्नेछ्न् र नसक्नेलाई राज्यले पछि हेरे भैहाल्छ ।” उनको तर्क छ ।

लक डाउनमा पैसा हुनेले पनि घरमै राखेको अवस्था नहुने हुँदा हुनेखाने वर्ग पनि समस्यामा रहेका हुनसक्ने उनले बताए । सरकारले घरघरमा प्याकेट पठाउँदा कालोबजारी नहुने र जनता घर बाहिर निस्कने अवस्थाको पनि अन्त्य हुने उनले जिकिर गरेका छन् ।

”अत्यावस्यक सामाग्री घरमै आउने भएपछि मानिसहरु घर बाहिर पनि निस्कनुपरेन । यसले एकातर्फ जनताले राहत पाउने त छदैछ । अर्कोतर्फ कोभिड १९ विरुद्ध घरमै बसेर लड्न सरकारले गरेको आह्वान पनि सार्थक हुन्छ ।” नेता ढकालको भनाइ छ ।

यो काम संघ, प्रदेश वा स्थानीय सरकार समेतले गर्न सक्ने सानो काम भएको उनको दावी छ । सरकारले संकटको बेलामा आफ्नो उपस्थिति बढाउनुपर्नेमा जोड दिँदै नेता ढकालले तब मात्र जनताले सरकारको आदेश आदरसाथ सजिलै मान्ने वातावरण बन्ने बिचार व्यक्त गरेका छन् । उनले कोभिड १९ विरुद्ध सरकारले चाहेमा स्वयंसेवा लगायत सक्रियताको लागि भक्तपुर पार्टी पंति तयार रहेको समेत जिकिर गरे ।