भक्तपुरपोस्ट संवाददाता भक्तपुर, १९ चैत
भक्तपुर, १९ चैतमहँगोमा स्वास्थ्य सामग्री खरिद गरेको आरोप लगाउदै स्वास्थ्यमन्त्री भानुभक्त ढकालविरुद्ध उजुरी परेको छ । अख्तियार दुरुपयोग अनुसन्धान आयोगमा उनीविरुद्ध उजुरी परेको हो ।
बजार मूल्यभन्दा चार गुणासम्म महँगोमा स्वास्थ्य सामग्री खरिद गरेको अभियोग लगाउदै विवेकशील नेपाली दलका रमेश पौड्यालले मन्त्री ढकालविरुद्ध उजुरी दिएका हुन् । उजुरीकर्ता पौड्याल बागमती प्रदेशसभा सदस्यसमेत हुन् ।
प्रदेश सांसद पौड्यालले अख्तियारको वेबसाइट मार्फत उजुरी दिएको बताएका छन् । ”अख्तियारको प्रवक्ताले उजुरी दर्ता भएको जानकारी गराउनु भएको छ ।” उनले भने ।
मेडिकल सामाग्री सप्लाईको अनुभव नै नभएको कम्पनीलाई तीन घन्टामै टेन्डर दिलाएको, कामै नलाग्ने र्यापिड टेस्टिङ किट सात करोड भन्दा बढीमा किनेको लगायतको विषय उजुरीमा उल्लेख गरिएको बताइएको छ ।