भक्तपुरपोस्ट संवाददाता चाँगुनारायण, २३ चैत
चाँगुनारायण, २३ चैतचाँगुनारायण नगरपालिका वडा नं. ८ सुडालमा पौडी खेल्ने क्रममा पोखरीमा डुब्दा एक युवककाे ज्यान गएकाे छ । सुडालस्थित वि.एम. इट्टाभट्टामा इट्टा बनाउनको लागि चाहिने पानी जम्मा गर्न बनाइएको पोखरीमा डुबी उनकाे ज्यान गएकाे हाे ।
उदयपुरकाे गाइघाट ४ आमटार घर भई वि.एम. इट्टाभट्टामा काम गर्ने बर्ष ३० को मुकेश राईकाे मृत्यु भएकाे प्रहरीले जनाएकाे छ । शनिवार दिउँसो मुकेश अचानक डुबी बेपत्ता भएको भन्ने जानकारी प्राप्त हुनसाथ महानगरीय प्रहरी वृत्त जगाती भक्तपुरबाट प्रहरी निरीक्षक राज कुमार थापाको कमाण्डमा अनुसन्धान टोली घटनास्थल पुगेको प्रहरीको भनाइ छ ।
पोखरीको पानी निकास गरी प्रहरीले शव प्राप्त गरेको महानगरीय प्रहरी परिसरका डीएसपी दिपक गिरीले जानाकारी दिए । उनका अनुसार घटनाको सम्बन्धमा थप अनुसन्धान कार्य भैरहेको छ ।