फाइल फोटो

बहुप्रतिक्षित बनेको महत्वाकांक्षी मेलम्चीको पानी आउँदो असार मसान्त भित्रै भक्तपुरमा आउने भएको छ । भक्तपुर नगर प्रमुख सुनिल प्रजापतिको अडान पछि उक्त पानी पहिलो चरणमा नै भक्तपुरमा आउने भएको छ ।

काठमाडौं उपत्यका खानेपानी व्यवस्थापन बोर्डको सोमबार बसेको बैठकले कार्य योजना संशोधन गरी पहिलो चरणमै भक्तपुर र किर्तिपुरमा मेलम्चीको पानी पठाउने सहमति गरेको हो ।

काठमाडौं उपत्यका खानेपानी लिमिटेड (केयुकेएल) का प्रमुख मिलन शाक्यले मेलम्चीको पानी पहिलो चरणमा काठमाडौं र ललितपुरमा मात्रै पठाउने कार्ययोजना पेश गरेपछि भक्तपुर नगरपालिकाका प्रमुख सुनिल प्रजापति र किर्तिपुर नगरपालिकाका प्रमुख रमेश महर्जनले गम्भीर आपत्ति प्रकट गर्दै कार्ययोजना संशोधन गर्न जोड दिएका थिए ।

नगर प्रमुख प्रजापतिले पानीको समस्या संग जुधिरहेको भक्तपुरका लागि यो खुशीको कुरा भएको बताए । पहिलो चरणमा काठमाडौं र ललितपुरमा मात्रै पानी पठाउने कार्ययोजना पेश भएपछि आफूहरु बिरोध गर्न बाध्य भएको उनले बताए । ‘सोमबार बसेको बैठकमा कार्य योजना संशोधन गरी पहिलो चरणमै भक्तपुरमा पानी झार्ने सहमति भएकाे छ । भक्तपुर पोस्ट संग मेयर प्रजापतिले भने । नेपाल सरकार आयोजना कार्यान्वयन निर्देशनालय (पीआईडी) ले नगरपालिकासित आवश्यक समन्वय विना ठाउँ ठाउँमा पाइप बिछ्याउने, खोला किनारमा पर्खाल निर्माण गर्ने र संरचनाहरु निर्माण गर्ने गरेकोतर्फ बोर्डको ध्यानाकर्षण गराइएको समेत उनको भनाइ छ ।

हाल काठमाडौं उपत्यकामा दैनिक ४३ करोड लिटर पानीको माग भएपछि औसत १२ करोड लिटरमात्रै आपूर्ति भइरहेको केयुकेएल प्रमुख शाक्यले जानकारी दिए । मेलम्चीबाट दैनिक १७ करोड लिटर पानी प्राप्त हुने हुँदा अब पानीको दुख नहुने उनले बताए ।

”मेलम्चीको पानी २०७७ असार महिनासम्ममा उपत्यकामा झार्ने नेपाल सरकारको तयारी छ । भक्तपुरमा हामी पहिलो चरणमै पानी ल्याइपुर्याउछौँ । केयुकेएल प्रमुख मिलन शाक्यले भने ।