भक्तपुर, २६ चैतभक्तपुरका पुराना बामपन्थी नेता विष्णु बासुकलाको निधन भएको छ । बुधवार आफ्नै निवासमा ७२ वर्षको उमेरमा उनको निधन भएको हो ।
नेपाल मजदुर किसान संगठनबाट बामपन्थी राजनीतिमा होमिएका बासुकला संयुक्त जनमोर्चा, एनेकपा (माओवादी) हुँदै पछिल्लो समय नेपाल कम्युनिष्ट पार्टी संग आवद्ध रहेका थिए । २०२२ सालबाट नै कम्युनिष्ट पार्टीको सदस्यता प्राप्त गरेका बासुकला नेकपा भक्तपुरको जिल्ला सल्लाहकारसमेत रहेका थिए ।
प्यारालाइसिस भएर ३ महिना अघि थला परेका बासुकलाकाे भक्तपुर २ स्थित निवासमा नै निधन भएकाे हाे । नेता बासुकलाका २ छोरा र १ छोरी छन् ।
बुधवार नै उनको पार्थिव शरीरलाई हनुमानघाटमा अन्त्यस्टि गरिएको पारिवारिक श्रोतले जनाएको छ । नेकपाका जिल्ला नेता मिलन सुवालले उनको पार्थिव शरीरमा नेपाल कम्युनिष्ट पार्टीको झण्डा ओडाई अन्तिम सम्मान व्यक्त गरेका थिए । उक्त अवसरमा तत्कालिन एनेकपा (माओवादी) भक्तपुर इन्चार्ज भाष्कर प्रधानाङ्ग लगायत नेता कार्यकर्ताको समेत उपस्थिति रहेको थियो ।