सूर्यविनायक, २८ चैत सूर्यविनायक ३ बालकोट स्थित ‘परेली आर्युबेद हाउस’ मा सिलबन्दी गरिएको छ । गैरकानुनी रुपले कस्मेटिक बस्तुहरुको उत्पादन गरेको अभियोगमा परेलीमा सिलबन्दी गरिएको हो ।
महानगरीय प्रहरी परिसर भक्तपुरका प्रहरी निरीक्षक कृष्ण प्र. बिष्ट र औषधि ब्यवस्था विभाग बिजुलीबजारका फार्मेसी अधिकृत धन बहादुर बोहोरासहितको टोलीले बिहीवार उक्त “परेली आर्युबेद हाउस” मा सिलबन्दी गरेको महानगरीय प्रहरी परिसर भक्तपुरले जनाएकाे छ ।
अनुमति प्राप्त गरेको भन्दा भिन्नै किसिमका कस्मेटिक बस्तुहरुको उत्पादन, प्याकिङ, लेवलिङ लगायतका कार्यहरु गरी अनाधिकृत रुपमा सामानहरु बिक्री बितरण गरिरहेको पाइएपछि सिलबन्दी गर्नुपरेको महानगरीय प्रहरी परिसर भक्तपुरले जनाएकाे हाे ।
महानगरीय प्रहरी परिसर भक्तपुरका डीएसपी दीपक गिरीका अनुसार काभ्रेपलाञ्चोक साबिक बाङथली ९ स्थायी घर भएकी बर्ष ३६ की कमला उप्रेती (अर्याल) ले उक्त उद्योग संचालन गरेको पाइएको छ । अनाधिकृत रुपमा साबुन, बिभिन्न ब्राण्डका क्रिम, कपालमा लगाउने तथा मसाज गर्ने तेल, लोसन लगायतका कस्मेटिक सामानहरुको उत्पादन, प्याकिङ तथा लेवलिङ लगायतका कार्यहरु गरेको पाईएको हुँदा कानूनको रीत पुर्याई जनप्रतिनिधिहरुको रोहवरमा उद्योग सिलबन्दी गरिएको उनले बताए ।
डीएसपी गिरीले सम्बन्धित बिभाग र निकायहरुसंग समन्वय गरी थप अनुस्धान कार्य भईरहेको समेत जानकारी दिए । यस अघि भक्तपुर प्रहरीको पहलमा औषधि ब्यवस्था विभागले भक्तपुर १० कमलविनायक स्थित एक आयुर्वेद फार्मेसी बाट गुणस्तर नभएको ह्याण्ड सेनिटाइजर बरामद गरेको थियो ।