भक्तपुर, २९ चैतनेपाल प्रहरीको रिक्त रहेको १० प्रहरी नायव महानिरीक्षक(डिआईजी) पदमा १० जना प्रहरी वरिष्ठ उपरीक्षक(एसएसपी) बढुवाका लागि सिफारिस भएका छन् । गृहमन्त्रालयले गठन गरेको बढुवा समितिले उनीहरुलाई बढुवा सिफारिस गरेको हो ।
सोमबारको मन्त्रिपरिषद् बैठकले डिआइजीको दरबन्दी १४ कायम गरेपछि रिक्त १० पदका लागि १० एसएसपीहरू शुक्रबार सिफारिसमा परेका हुन् ।प्रहरी नियमावली, २०७१ को नियम २७ को उप–नियम(४) बमोजिम उनीहरूलाई बढुवा गरिएको हो ।
३४ एसएसपीहरूबाट डिआईजीमा बढुवा सिफारिस हुने १० एसएसपीहरूमा भक्तपुर घर भएका एसएसपी सहकुल बहादुर थापा पनि परेका छन् । बढुवा समितिले उनको नाम पाँच नम्बरमा सिफारिस गरेको छ ।
डिआइजी बढुवाको सिफारिसमा परेका एसएसपी सहकुल बहादुर थापा सूर्यविनायक नगरपालिकास्थित नलिनचोक पलासेँका स्थायी वासिन्दा हुन् । पिता गणेशबहादुर थापा र माता ललितकुमारीका छोरा सहकुल बहादुर थापा २०४९ सालमा प्रहरी निरीक्षकबाट नेपाल प्रहरी सेवामा प्रवेश गरेका थिए । उनी २०७५ सालमा एसएसपीमा बढुवा भएका हुन् । हाल उनी महानगरीय अपराध महाशाखाका प्रमुखको रुपमा कार्यरत छन् । केहि दिन अघि मात्र थर्मोगन कालोबजारी गर्ने एक ठूला व्यवसायीलाई समात्न सकेको जस उनले पाएका छन् भने चिनीयाँ ह्याकर समात्ने देखि कृषि विकाश बैंकबाट पाँच अर्व ह्याक गर्ने योजना असफल बनाउने सम्मको श्रेय उनले महाशाखा प्रमुखको रुपमा हासिल गरेका छन् । डिआइजी बढुवाको सिफारिसमा परेका थापा नेपाल प्रहरीको सर्वोच्च पद प्रहरी महानिरीक्षकको समेत प्रवल दावेदार मानिएका छन् ।
उनीसंगै डिआईजीमा बढुवा सिफारिस हुनेमा एसएसपीहरु घनश्याम अर्याल, प्रकाशजंग कार्की, वसन्त कुमार पन्त, ईश्वर बाबु कार्की, धिरज प्रताप सिंह, वसन्त कुमार लामा, रबिन्द्र बहादुर धानुक, उत्तम राज सुवेदी र अरुण कुमार बि.सी. रहेका छन् ।
सच्याइएको : थापा पाँचौ नम्बरमा सिफारिस हुनुपर्नेमा अन्यथा भएकोले सच्याइएको छ । : सम्पादक
हेर्नुस् सिफारिस सूची
