मध्यपुर थिमि, २ बैशाखमध्यपुर थिमि नगरपालिकाले कोरोना रोकथाम र नियन्त्रण लागि कोरोना कोष खडा गरेको छ । उक्त कोषमा ५ करोड राखिएको छ ।
नगर प्रमुख मदन सुन्दर श्रेष्ठले जानकारी गराए अनुसार २ करोड नगरपालिका द्वारा संचालित नेपाल कोरिया मैत्री नगर अस्पतालको कोरोना बिरुद्ध स्तरोन्नतीमा खर्च गर्ने र बाँकी अन्य आवस्यक कार्यमा खर्च गर्ने उदेश्य रहेको छ । कोरोना बिरुद्ध मध्यपुरले योजनावद्ध काम गरिरहेको जिकिर गर्दै प्रमुख श्रेष्ठले कोरोनालाई जित्न सामुहिक सहयोगका लागि अपिल समेत गरे ।
उनले प्रत्येक वडामा पाँच लाखको दरले राहत बाढिएको समेत बताए । त्यसैगरी प्रत्येक वडामा औषधी छर्कने कार्य पनि भएको उनको भनाइ छ ।
प्रमुख श्रेष्ठले मध्यपुर थिमि नगरपालिकाद्वारा संचालित अस्पतालमा सोह्र बेडको आइसोलेसन कक्ष रहेको जानकारी दिए । उनका अनुसार अस्पतालको लागि २ वटा नयाँ भेन्टिलेटर समेत खरीद गरिएको छ र अब अस्पतालमा भेन्टिलेटरको संख्या ४ पुगेको छ । अस्पताल व्यवस्थापन समितिका अध्यक्ष समेत रहेका नगर प्रमुख श्रेष्ठले अस्पतालमा १ सय पीपीई रहेको तथा ल्याबमा कोरोनाको टेस्ट समेत हुने गरेको जानकारी गराए ।
उनका अनुसार नगरपालिकाले विदेशबाट पछिल्लो समय नगरभित्र आइ बसेका पन्ध्र देशका ५३ जनाको नमूना सङ्कलन गरी परीक्षण गर्दा सबैको नतिजा कोरोना नेगेटिभ आएको छ । ६५ जनाको पहिचान भएकोमा केहि गाउँ फर्केका र केहि सेल्फ क्वारेन्टाइनमा रहेका उनको भानाइ छ । अन्यको पनि निशुल्क कोरोना परीक्षण गरिने उनले बताए ।
नगरप्रमुख श्रेष्ठले पत्रकार सम्मेलन मार्फत उक्त कुरा सार्वजनिक गरेका हुन् ।उक्त अवसरमा अस्पतालका कार्यकारी निर्देशक प्रा डा ज्ञानकृष्ण कायस्थ,मेडिकल निर्देशक डा रोशन, नगरपालिकाका कानुन अधिकृत केशब सिलवाल लगायतको सहभागिता रहेको थियो ।