३१ वैशाख २०७७भक्तपुर । कोरानो संक्रमित भेटिएको दुईस्थानलाई सिल गरिने भएको छ । मंगलबार दुवाकोटमा बस्दै आएका एक पुरुष र मध्यपुर थिमि नगरपालिका, शंखधर चोकनजिकै बस्ने एक जना महिलामा कोरोना संक्रमण पुष्टि भएको थियो ।
जिल्ला प्रशासन कार्यालयले संक्रमित देखिएका दुवै स्थानलाई सिल गरिएको जनाएको हो ।संक्रमण पुष्टि भएसँगै बुधबार बिहान प्रहरीले दुवाकोट र शंखधर चोक आसपासको क्षेत्रलाई सिल गरेको छ ।
भक्तपुरकी प्रमुख जिल्ला अधिकारी हुमकला पाण्डेले अहिले संक्रमित देखिएको दुबै स्थानलाई सिल गरिएको जानकारी दिइन् ।
‘संक्रमित देखिएको दुइटै ठाउँ सिल गरिसकेका छौं’, प्रजिअ पाण्डेले भक्तपुर पोष्टलाई भनिन, ‘उनीहरुसँग सम्पर्कमा आएका व्यक्तिहरुको पहिचान गरिरहेका छौं ।’
भक्तपुरमा कार्यरत ती नर्स सुनसरीबाट आएर साथीको कोठामा आएर बसेकी थिइन् । साथी पनि भक्तपुरकै स्वास्थ्य संस्थामा कार्यरत नर्स हुन् । साथीको कोठामा बसेकै बेलामा उनमा संक्रमण पुष्टि भएको हो ।
सुनसरीबाट मोटरसाइकलमा आएकी संक्रमित महिला ‘हेल्थ केयर स्टाफ’ भएको खुलेको पाण्डेले बताइन् ।