News Portal

  • घर सिल गर्नुका साथै १ सय ६४ जनाको कोरोना टेस्ट गरेका छौं : वडाध्यक्ष रवीन्द्र ज्याख्व

    भक्तपुर, १४ जेठ
    ३२६५ पटक
    भक्तपुर, १४ जेठ

    (भक्तपुरमा कोरोना संक्रमितको संख्या ४ रहेकोमा दुवाकोटका २७ वर्षीय सुरक्षाकर्मी पुरुष र थिमी बस्ने २५ वर्षीया स्वास्थ्यकर्मी युवती केहि दिन अघि नै डिस्चार्ज भएका छन् भने भक्तपुर नगरपालिका वडा नम्बर ५ घर भै काठमाडौं महानगरपालिकामा कार्यरत एक पुरुष कर्मचारी तथा वडा नम्बर ९ की एक ४२ वर्षीया महिला जनप्रतिनिधि अस्पतालमा स्वास्थ्य लाभ गरिरहेको अवस्था छ । भक्तपुरमा कोरोना सतर्कताका सम्बन्धमा पछिल्लो अवस्थाबारे भक्तपुर नगरपालिका वडा नम्बर ९ का वडाध्यक्ष रवीन्द्र ज्याख्व: संग भक्तपुर पोस्टका लागि संजीप शुभचिन्तकले गरेको कुराकानीको सम्पादित अंश यहाँ प्रस्तुत गरिएको छ ।)

    वडाध्यक्ष ज्यू, वडा नम्बर ९ मा जनप्रतिनिधिलाई नै कोरोना पोजेटिभ देखिएको भन्ने छ । उहाँको स्वास्थ्य अवस्था कस्तो छ ।

    उहाँ अस्पतालमा रहेर स्वास्थ्य लाभ गरिरहनु भएको छ । उहाँमा कोरोना भाइरस संक्रमणको कुनै लक्षण देखिएको छैन । उहाँमा यस सम्बन्धी जटिल स्वास्थ्य समस्या छैन । स्वास्थ्य अवस्था सामान्य नै रहेको छ । पुन: परीक्षणपछि मात्र कोरोना बारे यकिन तथ्य आउने चिकित्सकहरुको भनाइ छ ।

    रिपोर्टले वडामा एक कोरोना पोजेटिभ देखाएपछि संक्रमणको विषयलाई लिएर स्थानीय कत्तिको चिन्तित छन् ?
    कोरोना भाइरस महामारी भएकोले स्थानीय चिन्तित हुनु स्वाभाविकै हो । यद्यपी, हामीले उक्त घर सिल गरेर परिवार र सम्पर्कमा रहेका सबैको स्वास्थ्य चाँज गर्दा हालसम्म कसैमा कोरोना पोजेटिभ पाइएको छैन ।

    हालसम्म कतिजनाको कोरोना परीक्षण गरिएको छ ?
    हालसम्म १ सय ६४ जनाको कोरोना परीक्षण गरिएकाे छ । त्यसमा १ सय १० जनाको रिपोर्ट प्राप्त भैसकेको छ । सबै रिपोर्टमा कोरोना नेगेटिभ देखिएको छ ।

    सामान्य रुघाखोकीमा पनि मानिसहरु कोरोना आशंकाले त्रसित हुने अवस्था छ । यस्तोमा वडाका जो कोहीले चाहेमा कोरोना टेस्ट गर्न पाउँछन् कि पाउँदैनन ?

    कोरोना टेस्टका लागि हामीसंग पर्याप्त किट छैन । हाम्रै वडामा रहेको जनस्वास्थ्य  केन्द्रमा हामीले परीक्षणका लागि नमूना संकलन गर्ने व्यवस्था मिलाएका छौं । सरकारले पर्याप्त टेस्टको सुबिधा नदिएकाले हामी सबैको कोरोना परीक्षण गर्न असमर्थ छौं । चिकित्सकको शिफारिसमा शंकास्पद कन्ट्याक्ट हिस्ट्री भएका र कोरोनाका लक्षणहरु देखिएकाहरुको मात्र कोरोना परीक्षण गरिंदै आएको अवस्था छ ।

    वडामा कोरोना देखिएपछि जनप्रतिनिधिहरु हतोत्साही त हुनुभएको छैन ?

    हामी उच्च मनोबलका साथ् स्थानीय जनताको स्वास्थ्य सुरक्षाको लागि खटिरहेका छौं । कोरोनासंग डराएर बस्ने छुट जनप्रतिनिधिलाई छैन । यससंग मुकाबिला गर्ने समय हो यो । हामी कोरोना महामारीलाई परास्त गर्न अझ सचेतता र सक्रियतापूर्वक लागिरहेका छौं ।

    कोरोना संक्रमण बिरुद्ध तपाईहरु कसरी काम गरिरहनु भएको छ ?
    हामीहरुले स्थानीय प्रशासन र प्रहरीसंग समन्वय गरी बिभिन्न रणनीतिहरु बनाएका छौं । लकडाउनलाई कडाइ गर्दै सामाजिक दुरी कायम गर्न चेतनामूलक प्रचारप्रसार गर्दै आएका छौं । अत्यावस्यक सामाग्रीको बजारलाई व्यवस्थित बनाएका छौं । सम्भावित संक्रमितहरुको पहिचान गरी स्वास्थ्य परीक्षण गर्दै आएका छौं । बाहिरी जिल्लाबाट भक्तपुर प्रवेशमा पूर्णतया रोक लगाएका छौं । स्वास्थ्य परीक्षणकाे रिपोर्ट बिना कोहिपनि आगन्तुक भक्तपुर प्रवेश गर्न पाउनेछैनन ।

    किनमेलमा निस्कदा कोरोना जोखिम कत्तिको छ ?
    हामीले समय तोकेर बिहान बेलुका सामाजिक दुरी सहित तरकारी बजार व्यवस्थापन गरेका छौं । खाद्यान्नका पसलमा भिडभाड हुन नदिन र सुरक्षा सामाग्री प्रयोगको अवस्था बारे अनुगमन बढाएका छौं । हात धुने पानी र साबुनको ठाउँ ठाउँमा व्यवस्था गरेका छौं । अनावश्यक काममा घर बाहिर निस्कन निरुत्साहित गर्नुका साथै किनमेलका नाममा सपरिवार घर बाहिर निस्कने हरुलाई रोक लगाएका छौं । किनमेल गर्दा सावधानी अपनाउन र सुरक्षित किसिममले सामान घर सम्म ल्याउन जनचेतना व्यापक बनाएका छौं ।

    दुई महिना भन्दा लामो लकडाउनका कारण काम गरी खानुपर्ने मानिसहरुको व्यवस्थापन कसरी गरिएको छ ?
    हामीले काम नगरी खान नपाउने र न्यून आय भएका मानिसहरुको पहिचान गरी पर्याप्त राहत वितरण गरेका छौं । खान समस्या भएमा उहाँहरु सिधै वडा कार्यालयमा सम्पर्क राख्न सक्ने र हामीले तत्काल सहयोग गर्ने व्यवस्था मिलाउदै आएका छौं । हाम्रोमा खान नपाएर कोही भोकै रहनुपर्ने अवस्था छैन ।

    वर्षा शुरु भैसकेको छ , किसानहरुको लागि यो समय महत्वपूर्ण मानिन्छ । लकडाउनका कारण उनीहरुलाई खेतीपाती गर्न कत्तिको असहज भएको छ ?

    हामी किसानहरुलाई खेतीपातीमा सहजीकरण गरिरहेका छौं । उहाँहरुकाे दैनिक काममा लकडाउनका कारण बाधा हुन नदिन हामी सचेत छौं । हामीले किसानलाई निशुल्क धानको बिउँ बाडेका छौं । कृषी कर्ममा घर बाहिर निस्कने स्थानीयलाई कुनै अवरोध छैन ।

    वडाका बालबालिकाहरुलाई कोरोनाको मनोबैज्ञानिक त्रासबाट बचाउन र उनीहरुलाई पढाईसंग जोड्न के उपाय अपनाइएको छ ?
    बालबालिकाहरुमा कोरोनालाई लिएर नकारात्मक बिचार , डर र त्रास हुनुहुँदैन । हामीले यस विषयमा अनावश्यक डर हटाउन तर सचेत गराउन आवश्यक प्रचारप्रसार गरिरहेका छौं । अभिभावकहरु समेत यस विषयमा सचेत हुनु आवश्यक छ । बालबालिका अनावश्यकरुपमा आतंकित हुनेगरी डर फ़ैलाउनुहुदैन । फेक न्युज र अफवाहहरुबाट उनीहरुलाई पर राख्नुपर्छ । जहाँसम्म उनीहरुको पठनपाठनको कुरा छ, देशैभर यो समस्या रहेकोले अहिले पढाईलाई भन्दा स्वास्थ्यलाई महत्व दिनुपर्ने अवस्था विद्यमान छ । यद्यपी, उनीहरुलाई कसरी सिकाइसंग जोड्ने भन्ने सम्बन्धमा हामी संबेदनशील रहेका छौं ।

    संकटको यस समयमा भक्तपुर पोस्ट मार्फत तपाईको संदेश के छ ?
    सम्पूर्ण आमाबुबा, दिदीबहिनी र दाजुभाइहरुलाई घरमै सुरक्षित बस्न अनुरोध गर्दछु । बाहिरबाट आउने परिचित/ अपरिचित जो कोही व्यक्तिबारे जानकारी गराउनु र उहाँहरुलाई कोरोना टेस्टका लागि आग्रह गर्नु हामी सबैको दायित्व हो । कोरोनाबारे अनावश्यक हल्ला, फेक न्युज, भ्रम र अफवाहहरुको पछि नलाग्नुहोला । मानसिक तनाव मुक्त रहेर सकारात्मक उर्जाका साथ् कोरोनामुक्त जीवनका लागि आआफ्नो तर्फबाट योगदान गरौँ भन्ने अनुरोध गर्दछु ।

    प्रतिकृया दिनुहोस्

    सडकमा उत्रियो गठ्ठाघरको नवदुर्गा महिला समुह

    सरसफाइ केन्द्रीत अभियान चलाइरहेको राष्ट्रको लागि दुई घण्टा अभियान लोकप्रिय बन्दै जाँदा भक्तपुरमा सरसफाइ अभियानकै...

    सार्वजनिक स्थल सफाइमा सक्रिय हुँदै गठ्ठाघरको नवदुर्गा महिला समुह

    सरसफाइ केन्द्रीत अभियान चलाइरहेको राष्ट्रको लागि दुई घण्टा अभियान लोकप्रिय बन्दै जाँदा भक्तपुरमा सरसफाइ अभियानकै...

    शासक दलहरु मन्त्री पदकै निम्ति हानाथाप गरिरहेका छन् : गोसाई

    नेपाल मजदुर किसान पार्टीका केन्द्रीय सदस्य एवं वागमती प्रदेश सभाका सदस्य सुरेन्द्रराज गोसाईले शासक दलहरु...

    सल्लाघारीमा जारी महोत्सवमा दैनिक हजारौको भीड, किनमेल र मनोरन्जन नै मुख्य आकर्षण

    सल्लाघारीस्थित १०८ रोपनी मैदानमा जारी ८ औं भक्तपुर औद्योगिक साँस्कृतिक पर्यटन तथा व्यापार महोत्सव धुमधामका...

    बागमती प्रदेशको महिला चालक उत्पादन कार्यक्रम भक्तपुरबाट शुरु

    बागमती प्रदेशमा महिला लक्षित रोजगार कार्यक्रम अन्तर्गत महिला सवारीचालक उत्पादन प्रक्रिया शुरु गरिएको छ ।...