भक्तपुरका चारैजना संक्रमितले कोरोना भाइरस (कोभिड १९) माथि विजय प्राप्त गरेपछि भक्तपुर कोरोनामुक्त भएको छ । शनिवार दिउँसो भक्तपुरका एक ४२ वर्षीय पुरुष अस्पतालबाट डिस्चार्ज भएसंगै भक्तपुरमा संक्रमितको संख्या शून्य भएको हो ।

बलम्बुस्थित सशस्त्र प्रहरीको कोभिड १९ विशेष अस्पतालमा १२ दिन अघि भर्ना भएका भेलुखेल घर भै काठमाडौं महानगरपालिकाका सफाई कर्मचारी रहेका एक ४२ वर्षीय पुरुष शनिवार सन्चो भएपछि डिस्चार्ज भएका हुन् । उनी भक्तपुरका तेस्रो संक्रमित पुष्टि भएका थिए । संक्रमण पुष्टि भएपछि उनी सशस्त्रको कोरोना विशेष अस्पतालमा भर्ना भै उपचाररत् थिए ।

अस्पताल श्रोतका अनुसार भक्तपुरका तेस्रो संक्रमित यी पुरुषसंगै ११ जना संक्रमितहरु पनि सन्चो भै शनिवार घर फर्किएका छन् । आज डिस्चार्ज हुनेमा ललितपुर र काठमाडौंका कोरोना बिजेताहरु रहेका छन् ।

भक्तपुरको प्रमुख जिल्ला अधिकारी हुमकला पाण्डेले ४ संक्रमित फेला परेपछि उनीहरुको कन्ट्याक्ट ट्रेसिंग गरी सम्भाव्य संक्रमितको कोरोना परीक्षण गरीएको जानकारी गराउंदै उनीहरुको सम्पर्कमा आएका सबैको कोरोना नेगेटिभ रहेको बताइन ।” भक्तपुरका सबै संक्रमित सन्चो हुनुभएको छ र उहाँहरुको सम्पर्कमा रहेका आफन्त र छिमेकी लगायत समुदायमा पनि संक्रमण देखिएको छैन । यो हाम्रो लागि सुखद समाचार हो ।” प्रजिअ पाण्डेले भक्तपुरपोस्ट संग भनिन् ।

यस अघि भक्तपुर नगरपालिका वडा नम्बर ९ की ४२ वर्षीया महिला जनप्रतिनिधिले सबैभन्दा कम समयमा कोरोनालाई जितेर विहीवार डिस्चार्ज भएकी थिइन् । उनले संक्रमित पुष्टि भएको एक साता नहुँदै कोरोना मुक्त भएर रेकर्ड नै बनाएकी छन् । उनी भक्तपुरकी चौथो संक्रमित थिइन् । पहिलो संक्रमित पुष्टि भएकी ठिमी बस्ने एक नर्स र दोस्रो संक्रमित दुवाकोटका एक प्रहरी जवानले यस अघि नै कोरोनामथि विजय प्राप्त गरिसकेका छन् ।