भक्तपुर, १० साउन नेपाल मजदुर किसान पार्टीलाई चिनिया कम्युनिष्ट पार्टीबाट सहयोग प्राप्त स्वास्थ्य सुरक्षा सामग्री ५ हजार थान सर्जिकल मास्क नेमकिपाले भक्तपुर नगरपालिकालाई हस्तान्तरण गरेको छ । पार्टीलाई प्राप्त उक्त सामाग्री नगरपालिकालाई हस्तान्तरण गरिएको हो ।
निर्वाचित सांसद समेत रहेका नेमकिपाका केन्द्रीय सचिव प्रेम सुवालले मित्र पार्टी चिनिया“ कम्युनिष्ट पार्टीबाट सहयोग प्राप्त स्वास्थ्य सुरक्षा सामग्री ५ हजार थान सर्जिकल मास्क भक्तपुर नगरपालिकाका प्रमुख सुनिल प्रजापतिलाई शुक्रबार एक समारोहबीच हस्तान्तरण गरेका हुन् ।
नगरपालिकालाई प्राप्त मास्कहरु सोही कार्यक्रममा नगर प्रमुख प्रजापतिले विभिन्न स्वास्थ्य सस्थाहरुलाई हस्तान्तरण गरेका छन् । सहयोगस्वरुप नगरपालिकालाई प्राप्त मास्कहरू सहिद धर्मभक्त राष्ट्रिय अंग प्रत्यारोपण केन्द्रलाई १ हजार थान, भक्तपुर क्यान्सर अस्पताललाई १ हजार थान, भक्तपुर अस्पताललाई १ हजार थान र भक्तपुर नपाद्वारा सञ्चालित जनस्वास्थ्य केन्द्रलाई २ हजार थान हस्तान्तरण गरेका नगर प्रमुखकी प्रेस संयोजक कीर्तिका प्रजापतिले जानकारी गराइन् ।
उक्त अवसरमा नेपाल मजदुर किसान पार्टीका सचिव एवं सांसद प्रेम सुवालले अन्तर्राष्ट्रिय सैनिक खेलकुद प्रतियोगितामा भाग लिन चीनको उहान पुगेका अमेरिकी सैनिकहरुले चीनमा कोरोना संक्रमण फैलाएको आरोप लगाए । अमेरिकाले कोरोना भाइरस फैलाएको भएपनि यो यथार्थलाई ढाकछोप गर्न अमेरिकाले ‘उहान भाइरस’ र ‘चिनियाँ भाइरस’ जस्ता भ्रम फैलाइरहेको उनको आरोप छ ।
त्यसैगरी भक्तपुर नगरपालिकाका प्रमुख सुनिल प्रजापतिले लकडाउनको समयमा भक्तपुरको स्थानीय जनताबाट सकारात्मक साथ र सहयोग प्राप्त भएकै कारण भक्तपुरका जात्रा तथा पर्वहरू औपचारिकतामै सम्पन्न भएको बताउदै चीनबाट सिकेर आफूहरुले कोभिड १९ नियन्त्रणका लागि प्रयास गरिरहेको जानकारी गराए ।
कार्यक्रममा भक्तपुर जिल्लाका प्रमुख जिल्ला अधिकारी हुमकला पाण्डेले कोभिड १९ नियन्त्रणको लागि भक्तपुर नगरपालिकाले गरेका प्रयासहरु सराहनीय र अरु स्थानीय तहहरुको लागि समेत उदाहरणीय रहेको भन्दै सन्तोष व्यक्त गरिन् ।
त्यसैगरी भक्तपुर अस्पतालका मेडिकल सुपरिटेण्डेण्ट डा. सुमित्रा गौतमले कोभिड १९ कहरका बीच पनि अस्पतालले सम्पूर्ण सेवाहरू सञ्चालन गरेको र स्वाब संकलन लगायत काम गरेको जानकारी गराउदै त्यसमा भक्तपुर अस्पतालको सहयोगका लागि धन्यवाद दिएकी थिइन् । सहिद धर्मभक्त राष्ट्रिय प्रत्यारोपण केन्द्रका इन्चार्ज प्रा.डा. प्रेम ज्ञवाली,भक्तपुर क्यान्सर अस्पताल रेडिएसन अनकोलोजिस्ट विभागीय प्रमुख उज्ज्वल चालिसे,जनस्वास्थ्य केन्द्र भक्तपुरका प्रमुख डा. रत्नसुन्दर लासिवा,वडा नं. ९ का वडाध्यक्ष रबिन्द्र ज्याख्व लगायतले पनि बिचार व्यक्त गरेका थिए ।