भक्तपुर, १० साउन भक्तपुर नगरपालिका वडा नंं ८ माहेश्वरीस्थित दुवेङ्क फल्चाको शनिबार शिलान्यास भएकाे छ । भक्तपुर नगरपालिकाका प्रमुख सुनिल प्रजापतिले दुवेङ्क फल्चाको शनिबार शिलान्यास गरेका हुन् ।
कार्यक्रममा नगर प्रमुख प्रजापतिले भक्तपुरको प्रसिद्ध ङातापोल मन्दिर जीर्णोद्धारका क्रममा प्राप्त जनश्रमदान र आर्थिक सहयोगका कारण अनुमानित भन्दा आधा बजेटमा जीर्णोद्धार सम्पन्न भएको बताउदै नगरबासीकाे साथ र सहयाेगले आफूहरु उत्साहित रहेकाे बताए । सांस्कृतिक तथा ऐतिहासिक सम्पदाहरुको संरक्षणमा भक्तपुरले गरेको काम र शैलीबाट अरु स्थानीय तहहरुले पनि सिक्न चाहेका खुलासा गर्दै यसकाे श्रेय जनतालाइ जाने उनकाे भनाइ छ ।
ठेकेदारमार्फत हुने विकास निर्माणका कार्यहरु कमजोर र कम गुणस्तरका हुने भन्दै उनले भक्तपुर नगरपालिकाले उपभाेक्ता समितिमार्फत निर्माणका कार्यहरु गर्ने गरेकाे जिकिर गरे । उनले यहाँका उपभाेक्ता समितिकाे इमान्दारीता उदाहरणीय रहेकाे भन्दै भक्तपुरको वातावरण र कला संस्कृति संरक्षणको लागि आवश्यक कानुन बनाइ अगाडि बढ्ने योजना रहेकोसमेत उद्घाेष गरे ।
भक्तपुर नपाको आ.व. २०७७÷७८ को वार्षिक बजेट रु. १ अर्ब ८२ करोड रहेको र बजेटका रकम नगरको विकास निर्माणमा प्रयोग हुनुका साथै नगर र नगरबासीहरुको हितमा प्रयोग हुने उनले प्रतिबद्धतासमेत प्रकट गरेका थिए ।
उक्त अवसरमा भक्तपुर नपा वडा नं. ८ का वडाध्यक्ष महेन्द्र खायमलीले जनश्रमदान तथा आर्थिक सहयोगको लागि आह्वान गरे ।
कार्यक्रममा नेमकिपा वडा नं. ८ का इन्चार्ज कृष्णप्रसाद कोजु, दुवेङ्के फल्चा पुनःनिर्माण उपभोक्ता समितिका अध्यक्ष लक्ष्मीनारायण दुवाल र स्थानीय राजन फेलुले पनि विचार ब्यक्त गरेका थिए ।