भक्तपुर, १५ साउनभ्रष्टाचार विरुद्ध अभिव्यक्ति दिएर चर्चामा आएका निजामति सेवाका उपसचिव प्रेम सञ्जेल कार्यकक्षमै कुटिएका छन् । श्रम तथा रोजगार कार्यालय विराटनगरका प्रमुख रहेका सञ्जेलमाथि कार्यकक्षमै कुटपिट भएकाे हाे ।
सञ्जेलमाथि विदाका दिन शनिवार कुटपिट भएकाे हाे । कार्यालयमा कार्यरत कर्मचारीले उनीमाथि कुटपिट गरेका प्रहरीकाे भनाइ छ ।उक्त कार्यालयमा करार सेवामा कार्यरत २ कर्मचारीले कुटपिट गरेका र सञ्जेलकाे अनुहारमा चाेटपटक समेत लागेकाे बताइएकाे छ । उनीहरुले बिहान कार्यकक्षमै सञ्जेललाइ पञ्चिङ मेसिन, चप्पल, लगायतले प्रहार गरी घाइते पारेपछि प्रहरी पुगेकाे थियाे ।
प्रहरीले कुटपिटमा संलग्न भएको आरोपमा दुई कर्मचारीलाई पक्राउ गरेकाे छ । पक्राउ पर्नेमा कार्यालय सहयाेगी नेत्र भट्टराई र मेनुका सापकोटा कोइराला रहेकाे प्रहरीले जनाएकाे छ ।
उपसचिव सञ्जेलले काममा पेलेको र गालीगलौज गरेको कर्मचारीहरुकाे आराेप छ । मानिसहरुले भने गलत धन्धा गर्नेकाे काम नभएपछि षडयन्त्रपूर्वक कुट्न लगाएकाे हुनसक्ने आशंका गरेका छन् । प्रहरीले आवश्यक अनुसन्धान भैरहेकाे भनेकाे छ । उपसचिव सञ्जेल सामाजिक संजालमा चर्चित भ्रष्टाचार विराेधी अभियन्ता हुन् । उनले सूर्यविनायक ५ तजटाेलकाे गाेरेटाे बाटाेमा ३ आना जग्गा लिएका भएपनि घर बनाउन सकेका छैनन् ।