सशस्त्र प्रहरी बल नेपालको भक्तपुरस्थित नम्बर २२ गणको गणपतीमा प्रहरी उपरीक्षक उद्धवबहादुर न्यौपाने आएका छन् । उनले आइतवारबाट हाजिर गरेका हुन् ।

सशस्त्र प्रहरी उपरीक्षक न्यौपानेलाई भक्तपुरकी प्रमुख जिल्ला अधिकारी हुमकला पाण्डेले आइतवार स्वागत गर्दै उनको सक्षम र सफल कार्यकालको शुभकामना समेत दिएकी छन् । उक्त अवसरमा नेपाली सेना वीरदल गणका गणपती शिवप्रसाद पौडेल,महानगरीय प्रहरी परिसर भक्तपुरकी प्रमुख एसपी तारादेवी थापा, राष्ट्रिय अनुसन्धानका भक्तपुर प्रमुख सुरेन्द्र कोइरालाले समेत सशस्त्र एसपी न्यौपान लाइ स्वागत गरेका थिए । उनको स्वागतमा भक्तपुरको गुहेश्वरीस्थित नम्बर २२ गणमा बिशेष स्वागत कार्यक्रम समेत सम्पन्न भएको छ ।

न्यौपाने सशस्त्रको सप्तरी प्रमुखबाट सरुवा भई भक्तपुर आएका हुन् । उनी सप्तरीस्थित छ नम्बर गणका गणपती रहेका थिए । गणपतीबाट गणपतीमै सरुवा हुने उनी भाग्यमानी कमान्डर भएका छन् । सुरक्षा निकायमा प्राय प्रमुख पद पाएकाहरु सरुवा हुँदा प्रमुख पदबाट बिमुख हुने प्रचलन जस्तै रहेको छ ।

साउन ८ मा भएको ७१ एसपीको सरुवामा प्रायजसो एसपीहरु गणपतीबाट बाहिनी,विभाग वा केन्द्रीय कार्यालयमा प्रमुख मातहत रहनेगरी सरुवा भएका भएपनि न्यौपाने नम्बर छ गण सप्तरीबाट नम्बर २२ गण भक्तपुरकाे प्रमुखमै सरुवा हुन सफल भएका छन् ।  नं. २२ गण भक्तपुरका गणपतीको रुपमा कार्यरत रहेका विश्वकुमार भट्टराईको भने केन्द्रीय कार्यालय अन्तर्गत कार्य तथा सीमा सुरक्षा विभागमा सरुवा भएको छ । भट्टराईको बिदाइ पछि न्यौपाने आएका हुन् ।