भक्तपुर, २२ साउन भक्तपुर स्थायी ठेगाना भएका ७२ बर्षिय असहाय हरि बहादुर शुद्धकार र उनकी ४० बर्षीय श्रीमतीलाई मानवसेवा आश्रम काठमाडौं शाखाले उद्धार गरेको छ । बुधवार उनीहरुलाई उद्धार गरी आश्रममा राखिएको हो ।
भक्तपुर स्थायी ठेगाना भएका शुद्धकार गएको पुष महिना सम्म काठमाडौंको चन्द्रागिरी स्थित एक उद्योगमा मेकानिक काम गर्दथे । प्यारालाइसि भएपछि उनी विगत ८ महिना देखी काममा जान सकेका थिएनन् । कोठा भाडा तिर्ने पैसा समेत नभएपछि उनी श्रीमती सहित सडकजीवन विताउन बाध्य भएका थिए ।
जाँड रक्सि र कुनै अम्मल नपिउने शुद्धकारको स्वभाव राम्रो भएकै कारण नैकाप शिवमन्दिर नजिकै रहेको एक परिवारले घरको पिँडीमा बास दिदै आएका थिए । सधै पिडीको बासले नहुने भएपछि मानव सेवा आश्रमले उद्धार गरेको हो ।
चन्द्रागिरी नगरपालिकाकाको अनुरोधमा उनीहरुलाई उद्धार गरी मानवसेवा आश्रम बुढानिलकण्ठ उपसेवा केन्द्रमा राखिएको आश्रमले भक्तपुरपोस्टलाई जानकारी गराएको छ । शुद्धकारको स्थाई घर भक्तपुर रहेको र कोहीपनि परिवारको आफन्तहरु समेत नभएको बुझिएको आश्रमकाे भनाइ छ ।
मानवसेवा आश्रम काठमाडौं शाखा काठमाडौं महानगरपालिकाको सहकार्य र जनमन संकलन अभियानबाट सञ्चालन हुँदै आइरहेको बताइएकाे छ ।
