भक्तपुर, २३ साउन जिल्ला प्रशासन कार्यालय भक्तपुरले अत्यावश्यक सेवा बाहेकका अन्य सेवाहरु बन्द गरेको छ । दुई साताका लागि सेवाहरु बन्द गरिएको हो ।
जिप्रकाले जनाए अनुसार बन्द भएका सेवाहरुमा नागरिकता र राहदानी सम्बन्धी सेवा परेका छन् । नागरिकता र राहदानीका लागि मानिसहरुको भिड लाग्ने भएपछि यी सेवाहरु बन्द गरिएका हुन् । त्यसैगरी संघ संस्था दर्ता/नवीकरण र सिफारिस सम्बन्धी कार्य लगायत अत्यावश्यक नभएका सबै सेवा समेत बन्द गरिएको छ । जिप्रकाले एक सूचना जारी गरी अर्को निर्णय नहुन्जेल भदौं ८ सम्मलाई सामान्य सेवा बन्द गरेको हो ।
अत्यावश्यक मानिने शान्ति सुरक्षा सम्बन्धी कार्यहरू, उजुरी र मुद्दा सम्बन्धी कार्य भने सुचारु राखिएको भक्तपुरका सहायक प्रजिअ दुर्गादत्त ढकालले जानकारी दिए । विपद् व्यवस्थापन कार्य र अत्यावश्यक कामका लागि सवारी पास सम्बन्धी सेवा पनि खुला रहेको उनको भनाइ छ । गृह मन्त्रालयको निर्देशमा उपत्यकाका तीनै सिडिओ सहितको बैठकको कार्यालय सट डाउन गर्ने निर्णय अनुसार अत्यावश्यक सेवा खुला र साे बाहेकका सामान्य सेवा बन्द गरिएको बताइएको छ ।