प्रहरीले भक्तपुरबाट जंगली जनावरकाे छालाको गैरकानुनी कारोबारमा संलग्न भएको अभियोगमा ७ जनालाई समातेको छ । चाँगुनारायण नगरपालिकाको सुडालबाट ४ जना र सूर्यविनायकको दार्जलिङ हाईटबाट ३ जना गरी ७ कारोबारी समातिएका हुन् ।

विशेष सुराकीको आधारमा महानगरीय प्रहरी परिसर भक्तपुर र महानगरीय प्रहरी अपराध महाशाखाको संयुक्त अनुसन्धान टोलीले उनीहरुलाई मंगलवार साँझ समातेको हो । डिएसपी दिपक गिरीले दिएको जानकारी अनुसार चाँगुनारायण ८ सुडाल स्थित सुरेश कार्कीको घरमा रेड गर्दा कोठा भाडामा लिई बसेका ४ जना मानिसहरु कालोमा खैरो र सेतो रंगको पाटे चितुवाको सुख्खा छाला र चोरीकाेे मोटरसाइकल सहित समातिएका छन् । त्यसैगरी उनीहरुको पोल अनुसार सूर्यविनायक ८ दार्जलिङ हाईटबाट थप थप ३ जना पक्राउ परेका छन् ।

पक्राउ पर्नेमा रामेछाप सुनापति गाउँपालिका स्थायी घर भई हाल चाँगुनारायण ८ सुडाल बस्ने बर्ष १९ को कुमार लामा,१७ वर्षीय फुसाङ तामाङ, १८ वर्षीय हिमाल लामा, बर्ष २१ को पासाङ तामाङ रहेका छन् । त्यसैगरी सूर्यविनायक ८ दार्जलिङ्ग हाइटबाट पक्राउ पर्नेमा काभ्रेपलाञ्चोक तिमाल गाउँपालिकाका बर्ष २२ को संजीव सिंजाली मगर रोशीका २४ वर्षीय दिपेश तामाङ र २३ वर्षीय मिलन मगर रहेका छन् ।

उनीहरुको साथबाट फेला परेको बा ९० प ६५१० नम्बरको २२० CC को पल्सर मोटरसाईकल भक्तपुर ९ का प्रजु सुवालको चोरी भएको मोटरसाईकल भन्ने खुल्न आएको समेत प्रहरीको भनाइ छ । नियन्त्रणमा लिईएका सातैजना उपर प्रारम्भिक अनुसन्धान भईरहेको साथै थप अनुसन्धानको लागी जिल्ला बन कार्यालय पठाईने डिएसपी दिपक गिरीले जानकारी दिए ।