भक्तपुर, ३० साउन भक्तपुरकाे प्रमुख जिल्ला अधिकारी हुमकला पाण्डेले १० बुँदे निषेधाज्ञा जारी गरेकी छन् ।.कोभिड १९ रोकथाम र नियन्त्रणका लागि उनले शुक्रवार राती १२ बजेदेखि लागू हुने गरी १० बुँदे निषेधाज्ञा जारी गरेकी हुन् ।
शुक्रवार एक सूचनामार्फत जारी आदेश अनुसार जिल्लाभित्र राती १२ बजेदेखि लागू हुने गरी केहि निश्चित क्रियाकलाप गर्न निशेष गरिएको हो । याे निषेधाज्ञा भदाै पन्ध्र गते राती १२ बजेसम्म रहने सार्वजनिक गरिएकाे छ ।
जारी आदेश अनुसार खुल्ला स्थानमा मानिस भेला/जम्मा हुन, भिडभाड गर्न, सभा/जुलुस गर्न, जात्रा महोत्सव सञ्चालन गर्न, दैनिक नित्य पूजा बाहेक सम्पूर्ण धार्मिक गतिविधि, स्वास्थ्य मापदण्डविपरितका गतिविधि, धार्मिक तथा सांस्कृतिक कार्य सम्बन्धी जमघट लगायतलाई निषेध गरिएकाे छ भने सबै प्रकारका सभा/गोष्ठी, तालिम, सेमिनार, हल/पार्टी प्यालेस, मनोरञ्जन स्थल, सैलुन, ब्युटी पार्लर, स्पा, स्वीमिङपुल, जीमखाना, समूहमा खेलिने खेलकुद, पुस्तकालय सञ्चालनमा पनि रोक लगाइएको छ । सङ्ग्रहालय, चिडियाखाना, फुटपाथ खुल्ला ठाउँ र ठेला गाडा तथा साइकलबाट सञ्चालित व्यापार/व्यवसाय, कवाडी सङ्कलन, स्वास्थ्य मापदण्ड विपरीत श्रमिक/कामदार ओसारपसार तथा टेकवेबाहेक होटेल/रेस्टुराँमा जमघट गर्न पनि नपाइने आदेशमा उल्लेख गरिएकाे छ ।
भक्तपुरकी प्रमुख जिल्ला अधिकारी हुमकला पाण्डेले भक्तपुर पाेस्टसंग कुरा गर्दै कोभिड १९ संक्रमण राेकथाम र नियन्त्रणका लागि निषेधाज्ञा जारी भएकाे भन्दै यसकाे अक्षरश: पालना हुनुपर्ने प्रष्ट पारेकी छन् । अनुगमनलाई तीब्र बनाउने बताउँदै प्रजिअ पाण्डेले निषेधाज्ञा ताेड्नेलाइ संक्रामक रोग नियन्त्रण ऐन अनुसार १ सय जरिवाना, १ महिना कैद वा दुवै सजाय हुने जानकारी गराइन् ।
पछिल्लो समय कोभिड संक्रमण दर बढेपनि मानिसहरुमा यसप्रतिको डर घटेका कारण संक्रमण नियन्त्रण चुनौतीपूर्ण बनेको देखिन्छ । संक्रामक रोग नियन्त्रणका लागि सिडिओलाई मूख्य जिम्मेवारी प्राप्त भएकोले सिडिओको सफलता र असफलतालाई पनि कोभिडसंग जोडिएर हेर्ने गरिएकाले सिडिओ कडा हुनुको बिकल्प छैन ।
हेर्नुस् आदेश
