विराटनगर, साउन ३२ । कोरोना संक्रमण देखिएपछि उपचारका लागि आइसोलेसनमा भर्ना गरिएका विराटनगरका एक पुरुषकी आमाको भने घरमै मृत्यु भएको छ ।
कोरोना शंकास्पद विराटनगर महानगरपालिका–३ की ८७ वर्षीया वृद्धाको शनिबार राति ९ बजेतिर आफ्नै घरमा भएको हो । कोरोना पुष्टि भएपछि उनका ५६ वर्षीय छोरालाई भने गत मंगलबार नै उपचारका लागि विराटनगरस्थित मारवाडी सेवा सदनको आइसोलेनसमा भर्ना गरिएको छ ।
छोरालाई आइसोलेसनमा भर्ना गरेर वृद्धाको भने पीसीआर परीक्षणका लागि बुधबार स्वाब संकलन गरेर कोशी अस्पतालको प्रयोगशालामा पठाइएको थियो । ज्वरो आउने लगायत कोरोनासँग मिल्ने लक्षण देखिएकी वृद्धाको मृत्यु भएपनि अहिलेसम्म रिपोर्ट आइसकेको छैन ।
कोरोना पुष्टि भएर छोरा आइसोलेसनमा पुगेपछि ती वृद्धाको स्याहारमा बुहारी खटेकी थिइन् । ढिलो रिपोर्ट प्राप्त हुँदा उनको शव व्यवस्थापन अन्योलमा परेको छ ।
वृद्धाका छोरा प्रदेश १ को पशुपंक्षी तथा मत्स्य विकास निर्देशनालयका अधिकृत हुन् । ती अधिकृत चालक र कार्यालयका अरु दुई जना अधिकृतसहित गत साउन १८ गते कृषि र भेटेरिनरीको अनुगमन निरीक्षणका लागि पहाडी जिल्ला ओखलढुंगा र सोलुखुम्बु गएका थिए ।
कार्यालयको काम सकेर साउन २० गते विराटनगर फर्किएका चार जनामध्ये उनीसहित तीन जनालाई पहाडमै हुँदा ज्वरो आएको थियो । त्यसपछि कोरोनाको आशंकामा विराटनगर आएर ज्वरो आउनेहरुले गत सोमबार परीक्षणका लागि स्वाब दिएका थिए ।
रिपोर्ट भोलिपल्ट मंगलबार पोजेटिभ आएपछि उपचारका लागि ती अधिृकतलाई भने आइसोलेनसमा भर्ना गरियो । उनीसँगै पहाडी जिल्लाको अनुगमनमा गएका चालकमा पनि कोरोना पुष्टि भइसकेको छ । परीक्षण गराएकामध्ये अर्का एक अधिकृतको रिपोर्ट भने नेगेटिभ आएको छ । एक जना अधिकृतले भने आफूलाई लक्षण नदेखिएको भन्दै पीसीआर परीक्षण नै नगराएको कार्यालयले जनाएको छ ।
आइसोलेसनमा भर्ना गरेर ती अधिकृतको परिवारलाई पनि ‘कन्ट्याकक्ट ट्रेसिङ’ गर्दै परीक्षणको दायरामा ल्याइएको थियो । बुधबार उनकी वृद्धा आमा, श्रीमती, दाजु, भाउजू, छोरा तथा दाजुका छोरी र ज्वाईको पीसीआर परीक्षणका लागि स्वाब संकलन गरिएको थियो ।
तर पीसीआर परीक्षणका लागि दिइएका आमासहित उनका पारिवारिक नाता सम्बन्धका ६ जनाकै रिपोर्ट चार दिनसम्म पनि प्राप्त भइनसकेको स्थानीय कुमार धमालले बताएका छ । अन्नपूर्ण पोस्ट्