चागुँनारायण, १ भाद्रचाँगुनारायण ८ सुडाल स्थित मुलसाँगु खोला तर्नेक्रममा चिप्लिएर एक महिलाको मृत्यु भएको छ । सोमबार बिहान ३२ वर्षिया महिलाको मृत्यु भएको हो ।
मृत्यु हुनेमा भक्तपुर ६ याछे सुकुलढोका घर भई हाल चाँगुनारायण न.पा. वडा नं. ८ मा नवराज लामिछानेको घरमा डेरा गरी बस्ने यसोदा सिजखु भएको प्रहरीको भनाइ छ ।सिजखु बिहान अन्दाजी ९:०० बजे तरकारी लिन भनी डेरा कोठाबाट निस्किएकोमा उक्त मुलसाँगु खोलाको किनारमा भएका बाँसको झ्याङबाट बासको तामा भाचेर बोरामा राखी फर्कनेक्रममा खोलामा डुबेकी थिइन् । खाेला तर्नेक्रममा चिप्लिएर डुब्दा उनले ज्यान गुमाएको प्रहरीको प्रारम्भिक अनुसन्धानले देखाएको महानगरीय प्रहरी परिसर भक्तपुरका डिएसपी दिपक गिरीले जानकारी दिए ।
”घटनास्थलबाट हेर्दा खोला तर्नेक्रममा खोलामा बनाएको स्ल्याबमा चिप्लिएर स्ल्याबबाट पानी झर्दा बनेको अन्दाजी ५ फिट गहिरो पानीको तहमा डुब्न गई मृत्यु भएको देखिएको छ ।” डिएसपी गिरीले भने । बिहान करिब ९ बजे भएको घटनाको जानकारी प्रहरीले करिब साढे १० बजे पाएको थियो । सूचना प्राप्त हुनासाथ महानगरीय प्रहरी परिसर भक्तपुरकी एसपी तारादेवी थापा र जगाती वृत्तका डिएसपी चक्रराज जोशी सहितको अनुसन्धान टोली घटनास्थल पुगेको थियो ।
घटना सम्बन्धमा थप अनुसन्धान कार्य भैरहेको प्रहरीको भनाइ छ ।