मध्यपुर थिमि, ७ भदौ भक्तपुरका जनयुद्धकालीन कम्युनिस्ट नेता बालकृष्ण प्रजापतिको असमायिक निधन भएको छ । आइतबार बिहान उनको निधन भएको हो ।
मध्यपुर थिमि वडा नम्बर ५ ताहननी स्थित निजी निवासमै उनको निधन भएको पारिवारिक श्रोतले जनाएको छ । कुनै स्वास्थ्य समस्या बिना नै करिब ६५ वर्षको उमेरमा निधन भएको उनको थिमि स्थित घाटमा अन्तिम सस्कार समेत सम्पन्न भएको बताइएको छ ।
उनको अन्त्येष्टिमा नेपाल कम्युनिस्ट पार्टी (नेकपा)का नेताकार्यकर्ता सहभागी भएका थिए । नेकपाका बागमती प्रदेश कमिटी सदस्य देवेन्द्र श्रेष्ठ, जिल्ला अध्यक्ष वचन देउजा,सचिव डीपी ढकाल, प्रदेश सभा सदस्य राजेन्द्रमान श्रेष्ठ, मेयर समेत रहेका जिल्ला नेता मदनसुन्दर श्रेष्ठ लगायतले पार्टीको झन्डा ओढाएर उनीप्रति अन्तिम श्रद्धाञ्जली व्यक्त गरेका थिए ।
प्रजापति तत्कालीन नेकपा (माओवादी)को जिल्ला नेता हुँदै हाल नेकपा भक्तपुरका जेष्ठ नेताकोरुपमा राजनीतिमा सक्रिय रहेका थिए । जनयुद्ध र विभिन्न आन्दोलनमा सक्रिय योगदान दिएका प्रजापतिको निधनले अपूर्णनीय क्षति भएको पार्टी सचिव डीपी ढकालको भनाइ छ । दिवङ्गत प्रजापतिका २ छोरा र ३ छोरीहरू छन् ।
