भक्तपुर, १४ भदौ कोरोना भाइरस संक्रमणका कारण भक्तपुरमा थप एकजनाको ज्यान गएको छ । होम आइसोलेसनमा रहेका एक सुन व्यवसायीले ज्यान गुमाएका हुन् ।
ज्यान गुमाउनेमा भक्तपुर नगरपालिका वडा नम्बर १ दूधपाटीका ६५ वर्षीय पुरुष रहेका वडाध्यक्ष श्यामकृष्ण खत्रीले जानकारी गराए । खत्रीका अनुसार मृतक सुन व्यवसायी हुन् र उनी गत ४ दिनदेखि होम आइसोलेसनमा रहेका थिए ।
अस्पतालमा भन्दा घरमै बसेर कोरोना जित्न सकिने बिश्वास राखेका उनी अन्तत: कोरोनासंग पराजीत बने । मृतकमा सुगर, प्रेसर लगायत दीर्घरोग रहेको थाहा भएको वडाध्यक्ष खत्रीले बताएका छन् । उनको मृत्युसंगै भक्तपुर नगरपालिकामा कोरोनाको कारण मर्नेको संख्या २ भएको छ भने जिल्लाभर यो संख्या ७ पुगेको छ ।
शनिबार राति उनको मृत्यु भएसंगै उनको कन्ट्याक्ट ट्रेसिङको कार्य भैरहेको वडाध्यक्ष खत्रीको भनाइ छ । उनको परिवार र सम्पर्कमा रहेका सबैको कोरोना परीक्षण गरिने खत्रीले जनाएका छन् ।
मृतकको शव व्यवस्थापनको लागि नेपाली सेनाको टोली परिचालन गरिएको सिडिओ हुमकला पाण्डेले बताएकी छन् ।