भक्तपुर, १७ भदौ काठमाडौं उपत्यकामा जारी निषेधाज्ञा थप एक साता लम्बिने भएकाे छ । भक्तपुर, ललितपुर र काठमाडौंका सिडिओहरुको संयुक्त बैठकले उपत्यकामा एक साता निषेधाज्ञा थप्ने निर्णय गरेको हो ।
काठमाडौं उपत्यकामा कोरोना संक्रमण बढिरहेको कारण एक साता निषेधाज्ञा थप्न जरुरी भएको भन्दै एक साता निषेधाज्ञा थप्ने निर्णय गरिएको भक्तपुर सिडिओ हुमकला पाण्डेले जानकारी दिइन् ।
निषेधाज्ञाको बाबजुद संक्रमितको संख्या भने घटेको छैन । भक्तपुरमा समुदायस्तरमा संक्रमण फैलिएको नभएपनि ललितपुर र काठमाडौंमा समुदायमै कोरोना फैलिएको स्वास्थ्य मन्त्रालयले जनाएको छ । निषेधाज्ञा नहुँदा संक्रमण झन् भयाबह रुपमा फैलन सक्ने निष्कर्षसहित सिडिओहरुको बैठकले एक साता निषेधाज्ञा थप्न निर्णय गरेको हो ।
भदौ तीन गतेदेखि काठमाडौं उपत्यकामा लागु गरिएको निषेधाज्ञा आज राती १२ बजेबाट सकिँदैछ । थपिएको निषेधाज्ञामा केही सेेवालाई भने नरोकिने सिडिओ पाण्डेले जनाएकी छन् । उनका अनुसार अनलाइन सेवा,होम डेलिभरी, निर्माण सम्बन्धी ब्यवसाय लगायत खुला रहनेछन् ।