भक्तपुर, १७ भदौ भक्तपुर,ललितपुर र काठमाडौंमा जारी निषेधाज्ञाको अवधी फेरि एक साता लम्बाइएको छ । तीनै जिल्लाका सिडिओहरुले एक आदेश जारी गर्दै निषेधाज्ञाको अवधी फेरि एक साता थपेका हुन् ।
आज बुधवार राति १२ बजेबाट गत बुधवार लगाइएको निषेधाज्ञाको अवधी सकिदैछ । भदौं ३ गते बाट भएको निषेधाज्ञा १० गते पुन एकसाताका लागि थपिएको थियो । आज दोश्रोपटक यसको समयावधी थपिएको हो ।
भक्तपुर,ललितपुर र काठमाडौंका सिडिओ सम्मिलित संयुक्त बैठकले उपत्यकामा कोरोना संक्रमणको जोखिम कायमै रहेको ठहर गरेकाले भदौ २४ गते राति १२ बजे सम्मका लागि निषेधाज्ञा जारी गरेको भक्तपुरकी सिडिओ हुमकला पाण्डेले बताइन ।
तीनै जिल्लाका सिडिओहरुले छुट्टाछुट्टै आदेश मार्फत भदौ २४ गते मध्यरातिसम्मका लागि निषेधाज्ञा जारी रहने बताएका छन् ।
भक्तपुरकी सिडिओ पाण्डेद्वारा जारी गरिएको आदेश अनुसार निषेधाज्ञाको स्वरुपमा केहि परिवर्तन गरिएको छ । यसअघि बिहान सबा ९ बजेसम्मका लागि किनमेलको समय दिइएकोमा यसलाई बढाइएको छ । अब बिहान ११ बजेसम्म किनमेल गर्न पाइने छुट दिइएको छ ।
होटल, रेष्टुरेन्ट, फुटपाथ पसल भने पूर्ण रूपमा बन्द गरिए पनि होम डेलिभरी गर्नेहरु पिसिआर नेगेटिभ आएकाले अनलाइन भुक्तानी लिने सेवाहरु डेलिभरी गर्न पाउने व्यवस्था मिलाइएको छ । निर्माण सामाग्री बोकेका गाडीहरु प्रवेशमा रोक लगाइएको छैन भने राष्ट्रिय प्राथमिकतामा परेका आयोजनाहरु संचालन गर्न पाउने बताइएको छ ।
अत्यावस्यक सेवाका उद्योग समेत संचालनमा रोक लगाइएको छैन भने शिक्षा मन्त्रालयको प्रोटोकल अनुसार अनलाइन कक्षा संचालन पनि सुचारु गरिएको छ । सिडिओ पाण्डेले संचालन गर्न पाउने सेवाको सोह्र बुदे लिस्ट बनाएकी छन् ।
हेर्नुस के गर्न पाइन्छ र के गर्न पाइदैन
