भक्तपुर, २० भदौ सूर्यविनायकस्थित सुवर्णेश्वर महादेवको मन्दिर क्षेत्रमा मर्निङ वाक आउनेहरू प्रहरीको फन्दामा परेका छन् । निषेधाज्ञाको अवज्ञा गर्दै मर्निङ वाकमा निस्कनेहरु प्रहरीको फन्दामा परेका हुन् ।
महानगरीय प्रहरी प्रभाग कटुन्जेले शनिवार बिहान एक दर्जन बढी मानिसहरूलाई नियन्त्रणमा लिएर होल्डिङमा राखेको थियो । प्रभागका इन्चार्ज समेत रहेका प्रहरी नायब निरीक्षक ज्योति कार्कीको कमाण्डमा खटिएको प्रहरी टोलीले बिनाकारण आवतजावत गरिरहेका मानिसहरुलाई नियन्त्रणमा लिएको हो ।
प्रहरीले गुण्डूबाट सवारीसाधन प्रयोग गरि बिनाकारण निस्केका मानिसहरू पनि नियन्त्रणमा लिएको थियो । करिब आधा घन्टा होल्ड गरेपछि उनीहरुलाई जताबाट आएको हो उतै फर्काउने गरिएको देखिन्थ्यो ।
प्रभागका इन्चार्ज ज्योति कार्कीले अत्यावश्यक काम प्रमाणित नहुने सवारी साधन र मानिसहरूलाई होल्डिङमा राख्ने गरिएको जनाएका छन् । प्रत्येक दिन आफ्नो क्षेत्रमा १ सयको हाराहारीमा मानिसहरुलाई नियन्त्रणमा लिनुपरेको उनको भनाइ छ ।
बिना काममा निस्केर बहादुरी देखाउने जस्तो भएको भन्दै उनले यस्ता मानिसहरू लाई नियन्त्रणमा लिएर कोभिड १९ बारे नागरिक दायित्व बोध गराइ छाड्ने गरिएको छ । निषेधाज्ञा लागू गराउन कटुन्जे प्रभागले टोलटोलमा प्रहरी गस्ती बढाएको इन्चार्ज कार्कीले बताएका छन् ।