ओखलढुंगा, ११ असोज । आफ्नो पहिलो सन्तानले धर्तीमा पहिलो पाइला टेक्ने मिति कुरेर बस्नुभएको थियो सुनकासी गाउँपालिका–५ की माया श्रेष्ठ । मायाका श्रीमान् बिर्ज तामाङ जिल्ला समन्वय समिति ओखलढुंगाको सवारी चालकको जागिरे हुनुहुन्छ । त्यसैले माया पनि श्रीमान्सँगै जिल्ला समन्वय समिति ओखलढुंगाको क्वाटरमा बस्नुहुन्थ्यो ।
मायाको गर्भमा नौ महिनाको शिशु हुर्किरहेको थियो । डाक्टरले असोज २ गते बच्चा जन्मिने समय तोकेकोे थियो । मायाका दम्पती सुत्केरीका लागि भदौ २९ गते नै नजिकैको सामुदायिक मिसन अस्पताल जाने तयारीमा थिए । पहिलो सन्तान भएकाले सुरक्षित सु्त्केरीका लागि पूर्णरूपमा तयारी गरेका थिए माया र बिर्जका जोडीले । समय बित्दै गयो मायाको अस्पताल जाने दिन पनि नजिकिँदै थियो । कोरोनाको त्रास ओखलढुंगामा पनि निकै बढिसकेको थियो ।
जिल्लामा कोरोना संक्रमितको संख्या बढ्यो कि बढेन भनेर सामाजिक सञ्जालमा आएका समाचारमा ध्यान जान्थ्यो मायाको । किनकि श्रीमान् बिर्ज तामाङ काम गर्ने कार्यालय मानिसको धेरै आउ–जाउ हुने कार्यालय थियो । बिर्ज जिल्लाका भीआईपीलाई गाडीमा बोकेर विभिन्न कार्यक्रममा जाने–आउने गर्नुहुन्थ्यो । केही गरी श्रीमान्लाई कोरोना पोजेटिभ देखिएमा आफूलाई पनि सर्ने र त्यसको असर गर्भमा रहेको बच्चालाई पर्न सक्छ भन्ने चिन्ता थियो मायालाई ।
जीवनमा कहिलेकाहीं नहोस् भनेको कुरा नै भोग्नुपर्छ भने जस्तै भयो मायालाई । भदौ २३ गते मायाका श्रीमान् काम गर्ने कार्यालयको प्रमुख, जिल्ला समन्वय समिति ओखलढुंगाका प्रमुखलगायत ९ जनामा कोरोना संक्रमण भएको पुष्टि शीर्षकमा लेखिएको समाचार सामाजिक सञ्जालभरि भेटिए । त्यसबखत आफू निकै अत्तालिएको कुरा मायाले कुराकानीको क्रममा बताउनुभयो ।
जिल्ला स्वास्थ्य कार्यालयले जिल्लाका उच्च तहका ९ जनामा कोरोना संक्रमण भएको भोलिपल्ट अर्थात् भदौ २४ गते संक्रमितको सम्पर्कमा रहेकाको स्वाब संकलन ग¥यो । त्यसै गरी मायाका दम्पतीले पनि आफूलाई कोरोना संक्रमण भए÷नभएको तथ्य थाहा पाउनका लागि स्वाब परीक्षणका लागि संकलन गराए । सुत्केरी कस्तो होला भन्ने चिन्ता त थियो नै उता कोरोनाको रिपोर्ट कस्तो आउला भन्ने पिरलो थपिएको थियो मायाको दम्पतीलाई । यत्तिकैमा भदौ २८ गते जिल्ला स्वास्थ्य कार्यालय ओखलढुंगाले मायाको दम्पतीलगायत १८ जनामा कोरोना पुष्टि भएको तथ्याङ्क सार्वजनिक ग¥यो ।
आफूलगायत श्रीमान्लाई कोरोना भएको थाहा पाएर आफू निकै अत्तालिएको मायाले बताउनुभयो । श्रीमान्ले कोरोना लाग्दैमा केही नहुने बरु गर्भमा रहेको बच्चालाई कोरोना संक्रमण हुन नदिन सजकता अपनाउनुपर्छ भनेर सम्झाएकाले विस्तारै आफू सम्हालिएको मायाले बताउनुभयो ।
यसै क्रममा जिल्ला स्वास्थ्य कार्यालयले कोरोना संक्रमण पुष्टि भएकामध्ये ८ जनालाई नजिकैको सामुदायिक मिसन अस्पताल सोब्रु र गर्भवती अवस्थामा रहेकी माया श्रेष्ठसहित बाँकी रहेका १० जनालाई जिल्ला अस्पताल रुम्जाटार लैजाने तयारी भइरहेको थियो । आफूलाई रुम्जाटार अस्पताल जाने मन पटक्कै नभएको मायाले बताउनुभयो । आफू गर्भवती त्यसैमाथि अप्ठ्यारो बाटो अझ मिसन अस्पताल सोब्रुको भन्दा जिल्ला अस्पताल रुम्जाटारको व्यवस्थापन राम्रो छ भन्ने सुनेका कारण जान नचाहेको मायाले बताउनुभयो । ‘मलाई रुम्जाटार अस्पताल नलानु सोब्रुमै राख्ने व्यवस्था मिलाउनु भनेर कत्तिलाई हारगुहार गरें तर मेरो मर्का कसैले बुझेनन् ।’ –गहभरि आँसु पार्दै काखमा दुधे बालक च्यापेकी श्रेष्ठले दुखेसो पोख्नुभयो ।
रुम्जाटार अस्पताल नै लैजाने भएपछि बेलुका नगएर भोलिपल्ट २९ गते बिहान जाने निधो गरेर आफूहरू क्वाटरमै बसेको माया दम्पती बताउँछन् । बेलुकीको खाना खाइसकेर भोलिपल्ट आइसोलेसनमा जाने तयारी गरेर सुतेकी मायालाई राति ११ बजे एक्कासि व्यथाले च्यापेकाले आफैले गाडी चलाएर मिसन अस्पताल पु¥याएको र राति १ बजे बच्चा (छोरा) जन्मिएको मायाका श्रीमान्ले बताउनुभयो । अस्पताल बसाइको क्रममा अस्तालका सम्पूर्ण स्वास्थ्यकर्मीको राम्रो साथ पाएको र आफूहरू दुवै जनालाई कोरोना संक्रमण भएका कारण बच्चामा संक्रमण नहोस् भनेर निकै सजकता अपनाएको पनि उनीहरू बताउँछन् । नेपाल समाचारपत्रबाट