मध्यपुर थिमि, १२ असाेजनेपाल क्षयरोग निवारण संस्थाको केन्द्रीय कार्यक्रमका रुपमा रहेको पैरवी समूहको गठन अभिमुखीकरण तथा वैठक कार्यक्रम भक्तपुरमा पनि सम्पन्न भएको छ । ठिमीस्थित एक पार्टी प्यालेसमा भक्तपुर शाखाले उक्त कार्यक्रम सम्पन्न गरेको हो ।
नेपाल क्षयरोग निवारण संस्था भक्तपुर शाखाका सभापति राम सिख्वःको सभापतित्वमा भएको उक्त कार्यक्रममा औषधी सेवन गरिरहेको र निको भएका क्षयरोगी विरामी करिब ५० जना सहभागी रहेका थिए । कोभिड १९ को सम्भावित संक्रमणलाई मध्यनजर गर्दै सम्पूर्ण सावधानी सहित कार्यक्रम गरिएको थियो ।
कार्यक्रममा प्रशिक्षक सुरेश प्रधानले क्षयरोग, चुनौति, समस्या र अधिकारका बारेमा प्रशिक्षण दिएका थिए भने विश्वभर महामारीको रुपमा फैलिरहेको कोरोना भाइरस अर्थात कोभिड–१९ ले क्षयरोगी विरामीहरुलाई पारेको असर र चुनौतीलगायत संस्थाको गतिविधि बारे संस्थाका सभापति राम सिख्वःले प्रकाश पारे ।
कार्यक्रममा ८ सदस्यीय पैरवी समूह गठन गरिएको छ । उक्त समूहमा संयोजक विनोद पुरी र सदस्यहरुमा प्रखिप लाखे, शनीमैंया वैद्य, सुनिल माकः, श्याम कपाली, प्रिया लाखे र नविना दुवाल रहेको संस्थाका कार्यालय सचिव सिहण्य प्रताप सांगामीले जानकारी गराए । पैरवी समूह गठन पश्चात आगामी कार्यक्रम समेत निर्धारण गरिएको थियो भने उक्त कार्यक्रमलाई संस्थाको तर्फबाट निरीक्षण गरी प्रतिवेदन पेश गरिएको संस्थाका उपसभापति विष्णु न्हिसुतुले जनाएका छन् ।