भक्तपुरपोस्ट संवाददाता भक्तपुर, १६ असोज
भक्तपुर, १६ असोजप्रहरी कर्मचारी हुँ भन्दै धाकधम्की दिई गिट्टी बालुवा झारेको पैसा असुल्न खोजेको अभियोगमा भक्तपुर नयाँठिमी बस्ने एक युवक पक्राउ परेका छन् । काठमाडौं महानगरपालिका-१ नक्सालस्थित कन्टेक प्रालिमा गिट्टी बालुवा झारेको पैसा असुल्न खोजेको अभियोगमा उनलाई पक्राउ गरिएको हो ।
पक्राउ पर्नेमा ओखलढुङ्गाको लिखु घर भई भक्तपुरको नयाँठिमी बस्ने ३२ वर्षीय कुल बहादुर बस्नेत रहेका प्रहरीको भनाइ छ । बिहीबार बिहान उनलाई महानगरीय प्रहरी वृत्त मालिगाउँबाट खटिएको प्रहरीले पक्राउ गरेको बताइएको छ ।
बस्नेत सहित ४ जनाले प्रहरी हुँ भन्दै नक्सालस्थित कन्टेक प्रालिमा गिट्टी बालुवा झारेको पैसा माग्दै धाकधम्की दिई हुलहुज्जत समेत गरेको प्रहरीले दावी गरेको छ ।
घटनामा संलग्न अन्य व्यक्तिहरुको खोजी गर्नुका साथै यस सम्बन्धमा थप अनुसन्धान गरिरहेको प्रहरीले जनाएको छ ।