सूर्यविनायक नगरपालिका वडा नम्बर ९ नंखेलस्थित नंखेल युथ क्लबको आयोजनामा स्थानीयलाई बहुगुणी जडिबुटी गुर्जोको विरुवा वितरण गरिएको छ । शुक्रवार साँझ क्लबले स्थानीयलाई गुर्जोको विरुवा वितरण गरेको हो ।

गुर्जो अभियन्ता कमल बहादुर राजलवटले नंखेल युथ क्लबलाई निशुल्क गुर्जोका विरुवा उपलब्ध गराएका र उक्त विरुवा स्थानीयलाई बाँडिएको अध्यक्ष श्यामसुन्दर कासुलाले बताए । क्लवका अध्यक्ष कासुलाका अनुसार २ सय २० वटा गुर्जोको विरुवा नंखेलमा वितरण गरिएको छ । गुर्जोको विरुवा लिन स्थानीयको उत्साहजनक उपस्थिति रहेको थियो । उपत्यकामा एक घर एक गुर्जोको बोट अभियान अन्तर्गत नंखेलमा विरुवा वितरण गरिएको आयोजकको भनाइ रहेको छ ।

आयुर्बेद चिकित्सामा कोरोना भाइरसको सङ्क्रमणबाट बच्न रोग प्रतिरोधी क्षमता विकास गर्ने बहुपयोगी आयुर्वेदिक वनस्पति मानिएकाे गुर्जो रोप्ने क्रम बढ्न थालेको छ । गुर्जोले रोग प्रतिरोधी क्षमता बढाउने अपेक्षा सहित नंखेलका स्थानीयमाझ बिरुवा वितरण गरिएको क्लबका अध्यक्ष श्याम सुन्दर कासुलाले जानकारी गराएका छन् ।