भक्तपुर, १८ असाेज महानगरीय प्रहरी परिसर भक्तपुरका सूचना अधिकारीसमेत रहेका प्रहरी नायब उपरीक्षक (डिएसपी) दिपक गिरीले कोरोना भाइरस रोग(कोभिड १९) माथि बिजय प्राप्त गरेका छन् । ११ दिनपछि उनले कोभिड १९ लाई पराजित गर्न सफल भएका हुन् ।
कोरोना नेगेटिभ भएपछि डिएसपी गिरी अस्पतालबाट डिस्चार्ज भएका छन् । ११ दिन अघि उनमा कोरोना पुष्टि भएको थियो । लक्षण देखिएका बिरामी भएकाले उनलाई उपचारका लागि महाराजगंजस्थित प्रहरी अस्पताल पुर्याइएको थियो । आइतवार उनीसहित भक्तपुरका १ दर्जन प्रहरी कोरोनामाथि विजय प्राप्त गर्दै डिस्चार्ज हुन सफल भएका छन् ।
डिएसपी गिरी डिस्चार्ज भएपनि परिसरमा हाजिर नहुने परिसर प्रमुख एसपी तारादेवी थापाले बताइन । उनी केहि दिन घरमा आराम गरेर मात्र परिसर आउने थापाको भनाइ छ । गिरीको ठाउँमा कामकाजका लागि हेडक्वाटरबाट डिएसपी केशवकुमार थेबे आएका छन् ।
भक्तपुरका एसपी थापा र डिएसपी गिरी भर्खरै संविधान दिवसका अवसर पारेर सरकारले प्रवल जनसेवा श्री (चतुर्थ) द्वारा सम्मानित गर्ने निर्णय गरेका प्रहरी अधिकृत हुन् ।
सच्याइएकाे : प्रवल जनसेवा श्री (चतुर्थ) हुनुपर्नेमा अन्यथा भएकाेले सच्याइएकाे छ ।