भक्तपुर, २२ असाेजगत सोमबार बेलुकी मध्यपुर थिमिको कमेरोटारस्थित एस.एस.गार्मेन्ट्समा चोरी भयो । गार्मेन्ट्समै पोशाक उत्पादनकाे काम गर्दै आएका २ जनाले तयारी पोशाक चोरी गरेर फरार भएका आशंका गरियो । नजिकै रहेको महानगरीय प्रहरी वृत थिमिले आरोपीहरुको धुइपताल खोजी गर्यो । तर, उनीहरु भक्तपुरभरि कतै पनि भेटिएनन् ।
एस.एस.गार्मेन्ट्सबाट ६ सय थान तयारी पाईन्ट संगै धनुषा गणेशमान चारनाथ नगरपालिका ४ घर भएका बर्ष १९ का मेहबुब आलम र जिल्ला सप्तरी खडक नगरपालिका १ बस्ने बर्ष २० को इजारुल अलि गायब भएका थिए । कपडा संगै पेगासस कम्पनीको ओभरलक गर्ने एउटा मेसिन पनि चोरी गरीएकोले फरार भएका आलम र अलि तिरै प्रहरीको अनुसन्धान सोझिएको थियो ।
प्रहरीले धनुषास्थित आलमको घर सम्म पुगेर उनलाई पक्राउ गर्न सफल भयो । आलमकै घरमा अर्का अभियुक्त समेत भेटिएपछि प्रहरीले दुबैलाई लिएर आयो र जिल्ला अदालतबाट म्याद थप गरी अनुसन्धान गरिरहेको प्रहरीले जनाएको छ । उनीहरु लाई थिमि वृत्तमा राखेर अहिले अनुसन्धान भैरहेको महानगरीय प्रहरी परिसरका सूचना अधिकारी एवं डिएसपी केशव कुमार थेबेले जानकारी गराएका छन् ।
वृत्त प्रमुख रहेका डिएसपी ऋषिराम कडेलका अनुसार उक्त घटनाको अनुसन्धान गर्दा चोरीमा ट्याक्सीको प्रयोग भएको देखिएको छ । उनका अनुसार गत सोमबार साँझ गार्मेन्ट बाट चोरी गरी भागेका आलम र अलिले झुक्याएर ट्याक्सी ड्राइभरलाई घरसम्म पुर्याएको पाइएको छ ।
थिमिका स्थानीय समेत रहेका एक ट्याक्सी ड्राइभरलाई पन्ध्र सय रुपैया दिने भन्दै उनीहरुले कलङ्की लिएर हिडेकोमा बाटोमा प्रलोभन देखाई घरसम्म पुर्याउन लगाएको डिएसपी कडेलले जानकारी दिए । ” १० हजार दिने भनेपछि कलङ्की नगई बिपी लोकमार्गबाट सिन्धुली बर्दीवास हुँदै ट्याक्सीमा चोरीको सामान पास गराइएको देखियो ।” उनले भने ।
ट्याक्सी ड्राइभरलाई दिन १० हजार नभएपछी उनीहरुले पैसठ्ठी सय नगद र ४ वटा पाइन्ट दिएर टारेको अनुसन्धानमा उनले बयान दिएको डिएसपी कडेलले बताए । आफूलाई चोरीको सामान भन्ने थाहा नभएको र पैसाको लोभमा चोरको चंगुलमा परिएको ट्याक्सी ड्राइभरले बयान दिएका उनले बताए ।
भनिन्छ कानुनको हात लामो हुन्छ । प्रहरीले ट्याक्सी ड्राइभरलाई बयानकै आधारमा बिस्वास गरेन । प्रहरीले ट्याक्सी ड्राइभरको हिस्ट्री हेरेर उनको व्यक्तिगत जीवनबारे अनुसन्धान गर्दा कतैबाट पनि चोरीमा संलग्नता पुष्टि हुन नसकेपछि सरकारी गवाहको रुपमा उनलाई अदालतमा पेश गर्ने तयारी गरेको छ । यद्यपी आफ्नो पेशाका कारण अन्जानमै चोरलाई यात्रु बनाउदा ट्याक्सी ड्राइभर कानुनको कठघेरामा उभिन बाध्य भएका छन् । यसबाट उनको मानसिक तनाव त् बढेको छ नै अदालतको अन्तिम फैसलासम्म उनको मुटुको बेग बढीनै रहने देखिन्छ ।
यस घटनाबाट हरेक ट्याक्सी ड्राइभर सतर्क र सचेत बन्नु पर्ने महानगरीय प्रहरी परिसर भक्तपुरकी प्रमुख एवं एसपी तारादेवी थापा बताउँछिन । पैसा आउने भयो भन्दैमा आखाँ चिम्लेर यात्रामा निस्कन नहुने उनको सुझाव रहेको छ ।