भक्तपुर, २८ असोजसर्वसाधारणको पहुँचमा रहेको भक्तपुरको दुधपाटीस्थित सरकारी अस्पताल भक्तपुर अस्पतालमा ल्याप्रोस्कोपी सर्जरी शुरु भएको छ । ल्याप्रोस्कोपी सर्जरी भनेको दूरबिनबाट गरिने शल्यक्रिया हो ।
बुधवार स्थानीय एक बिरामीको पहिलोपटक दूरबिन बिधिबाट पित्तथैलीको सफलतापूर्वक शल्यक्रिया सम्पन्न गरिएको अस्पतालकी मेडिकल सुपरिटेण्डेन्ट डा. सुमित्रा गौतमले बताइन् । सर्जन डा. रंजीश पहाडीको नेतृत्वमा रहेको टोलीले ल्याप्रोस्कोपी सर्जरी सफलतापूर्वक सम्पन्न गरेको हो ।
बागमती प्रदेश मातहत रहेको यस अस्पतालको बिकाशमा सामाजिक बिकाश मन्त्री युवराज दुलालले चासो राख्दै बजेट व्यवस्था गरिदिएपछि अस्पतालले शल्यक्रियामा दूरबिन बिधि भित्राएको डा गौतमले जानकारी गराइन् । उनका अनुसार मन्त्री दुलालले मन्त्रालयको अस्पताल गुणस्तर सुधार कार्यक्रम अन्तर्गत रु. १ करोड ३५ लाखको बजेट व्यबस्थापन गरिदिएपछि यो सम्भव भएको हो ।
नयाँ प्रविधि भएपनि याे जनताको पहुँचमा भएको डा गौतमले जनाएकी छन् । निजी अस्पतालमा १ लाखसम्म पर्ने पित्तथैलीको शल्यक्रिया भक्तपुर अस्पतालमा रु. २० हजारमै हुने उनको भनाइ छ । आधुनिक प्रविधिको स्वास्थ्य सेवाको खोजीमा काठमाडौं पुग्ने भक्तपुरबासीलाई यो सेवाले आकर्षित गर्ने र घर छेउमै रहेको अस्पताल आउन प्रेरित गर्ने डा गौतमले विस्वास व्यक्त गरेकी छन् । वीर र शिक्षण अस्पताल लगायतमा पालो कुरेर बसेकाहरु पनि सेवा लिन भक्तपुर आउन सक्ने उनको अनुमान छ ।
ल्याप्रोस्कोपी सर्जरी पेटमा स–साना प्वाल बनाई दूरबिनको मद्दतले गरिने शल्यक्रिया हो । ल्याप्रोस्कोपी सर्जरीपछि कम पीडा हुने, उपचारपछि चाँडै डिस्चार्ज गर्न सकिने र तुलनात्मक रूपमा कम संक्रमण हुने बताइन्छ । क्यामरा प्रोजेक्टरबाट उपचार कार्य बाहिर देखाउन मिल्ने हुँदा बिरामीका आफन्तहरूले पनि शल्य प्रक्रियाको प्रत्यक्ष प्रसारण वा भिडियो रेकर्ड हेर्न पाउँछन् भने चिकित्सा शिक्षाका विद्यार्थीलाई पनि यो रेकर्ड उपयोगी हुनसक्छ ।
उच्च दक्षता चाहिने यो उपचार विधिमा सिकारु डाक्टरहरूले सफलता हासिल गर्न नसक्ने भन्दै अस्पताल विकाश समितिका अध्यक्ष मिलन सुवालले ल्याप्रोस्कोपी सर्जरीको सफलता संगै भक्तपुर अस्पतालका चिकित्सकहरु अनुभवी र योग्य रहेको प्रमाणित भएको दावी गरे । अस्पतालको लागि यो एक एतिहासिक सफलताको कुरा भएको उनको भनाइ छ । अध्यक्ष सुवाल र मेसु डा गौतमको सबल नेतृत्वकै कारण ११६ वर्षपछि पहिलोपटक आइसियुसमेत सन्चालनमा ल्याएको भक्तपुर अस्पतालले दूरबिन बाट शल्यक्रिया गर्ने भएसंगै अस्पताल बिकाशका दृष्टिले यो कोशेढुङ्गा सावित हुने पूर्वअध्यक्ष सुरेश न्यौपाने बताउँछन ।