भक्तपुर, ३० असोज बिहीबार राति सडकमा अनौठो दृश्य देखियो । अबेर भक्तपुर फर्कदै गरेको तपाइहरुले सडकमा गुडिरहेको हेलिकप्टर देख्दा अचम्म मान्नुभयो होला ! हो, सधै आकाशमा उडेर यात्रा तय गर्ने नेपाली सेनाको एमआई १७ हेलिकप्टरले बिहीवार सडकमा गुडेर आफ्नो यात्रा तय गर्यो ।
नेपाली सेनाको एमआई १७ हेलिकप्टरलाई खरिपाटीस्थित सैनिक प्रतिष्ठानमा ल्याइएकाे हाे । यो यात्रा सम्भवत: यसको अन्तिम यात्रा हो । नेपाली सेनाको एमआई १७ हेलिकप्टर सेवामुक्त(डिकमिसन) भएपछि यसलाई खरिपाटीस्थित सैनिक प्रतिष्ठानमा ल्याइपुर्याएको छ । कुनै समय आकाशमा गोता खाने यसको रिटायर्डपछिको समय खरिपाटीको सैनिक प्रतिष्ठानमै सिमित बन्ने भएको छ ।
डिकमिसनपछि हेलिकप्टरलाई विमानस्थलबाट खरिपाटीमा डम्प गरिएको नेपाली सेनाका प्रवक्ता सन्तोष वल्लभ पौडेलले पुष्टि गरेका छन् । यसले उडान भर्ने समय समाप्त गरेका कारण सैन्य कार्यमा प्रयोग गर्न नमिल्ने भएपछि डिकमिसन गरिएको उनले बताए ।
बिहीबार राति ८ बजे सडक मार्गबाट यो हेलिकप्टर खरिपाटी ल्याइएको हो । त्रिभुवन अन्तराष्ट्रिय विमानस्थलबाट रिटायर्ड भएको यो हेलिकप्टरलाई सिनामंगल–सल्लाघारी–जगाती र कमलविनायक हुँदै खरिपाटी ल्याइएको छ । ल्याउनेक्रममा केहि ट्राफिक जाम हुनाका साथै मानिसहरुले कौतुहलतापूर्वक यसको अवलोकन समेत गरेका थिए ।