भक्तपुर, ३ कात्तिकभक्तपुर क्षेत्र नम्बर २ का निर्वाचित संघीय सांंसद महेश बस्नेतले आफ्नो नाममा आएको दशै भत्ता भक्तपुर अस्पताललाई हस्तान्तरण गरेका छन् । सोमबार आफै उपस्थित भएर बस्नेतले रकम हस्तान्तरण गरेका हुन् ।
कोरोना कहरका बीच पनि सांंसदहरुले दशै भत्ता लिएको समाचार बाहिरिएपछि उनीहरु जनतामाझ आलोचित बनेका थिए । नेकपा प्रवक्ता समेत रहेका सांंसद नारायणकाजी श्रेष्ठ बाहेक सबैले भत्ता लिएको समाचारमा भनिएपछि भत्ता फिर्ता गर्ने लहर नै चलेको छ ।
यसैबीच सांंसद बस्नेतले ६५ हजार दशै भत्ता वापतको रकम भक्तपुर अस्पतालका अध्यक्ष मिलन सुवाल र मेसु डा सुमित्रा गौतमलाई हस्तान्तरण गरे । उक्त रकम गरीब तथा असहायको उपचारमा खर्च हुने गरि हस्तान्तरण गरिएको बस्नेतले बताए । आफूलाई थाहा नभइ खातामा भत्ता वापतको पैसा जम्मा भएको उनले जिकिर गरे । कोरोना भाइरस संक्रमणले आक्रान्त जनताले यसको विरोध गर्नु स्वभाविक भएको र जनअपेक्षाको कदर गर्नु आफूहरुको कर्तब्य भएको उनको भनाइ छ ।
उक्त अवसरमा सांंसद बस्नेतले भक्तपुर अस्पतालको कोभिड ब्लक लगायतको स्थलगत अनुगमन गरेका थिए भने अध्यक्ष सुवाल र मेसु डा गौतमले कोभिड उपचारमा गरिएका कामहरुबारे अवगत गराएका थिए ।