भक्तपुर औद्योगिक क्षेत्रभित्र सञ्चालनमा रहेको टेक्सटायल उद्योग नेपो इण्डष्ट्रिज प्रा.लि.मा अनुगमन गरिएको छ । सोही क्षेत्रका सांसद प्रेम सुवालको पहलमा नेपोको प्रदुषणबारे अनुगमन गरिएको हो ।

नेपाल मजदुर किसान पार्टीका केन्द्रीय सचिव समेत रहेका संघीय सांसद प्रेम सुवालको पहलमा स्थानीय सरकारसहितको टोलीले ध्वनी र धुँवा प्रदूषणबारे अनुगमन शुक्रबार सम्पन्न गरेको छ । उक्त टोलीमा भक्तपुर नगरपालिकाका प्रमुख सुनिल प्रजापति, उपप्रमुख रजनी जोशी लगायत सहभागी रहेका थिए । त्यसैगरी औद्योगिक क्षेत्र व्यवस्थापन लि. केन्द्रीय कार्यालयका प्रतिनिधिहरु समेत उक्त टोलीमा सहभागी रहेका थिए ।

वडा नं. २ स्थित भक्तपुर औद्योगिक क्षेत्रभित्र सञ्चालित नेपो इण्डष्ट्रिज प्रा.लि.को प्रदुषण बारे ब्यापक जनगुनासो आएपछि उक्त प्रालि अन्तर्गत सञ्चालनमा रहेका विभिन्न उद्योगहरुबाट भएको ध्वनी र धुँवा प्रदूषणबारे अनुगमन भएको नगरप्रमुख सुनिल प्रजापतिले बताए ।

”उद्योगहरुले फालेको ध्वनी र धुँवा प्रदूषणले स्थानीय जनस्वास्थ्यमा प्रतिकूल असर पु¥याइरहेकोबारे व्यापक जनगुनासो देखिएपछि अनुगमन भएको हो ।” नगरप्रमुख प्रजापतिले प्रष्ट पारे । जनताको गुनासो सम्बोधन गर्नु नगरपालिकाको कर्तब्य भएको भन्दै उनले अस्तव्यस्त पाराले उद्योग संचालन अस्वीकार्य हुने बताए । स्थानीय जनताको स्वास्थ्यमा प्रतिकूल असर पार्ने कार्य स्वीकार्य नहुने भन्दै उनले उद्योग संचालनमा अप्ठ्यारो पार्ने आफूहरुको उदेश्य नरहेको तर स्थानीय जनतालाई पनि अप्ठ्यारो हुने काम उद्योगले गर्नु नहुने तर्क गरे ।

उक्त अवसरमा स्थानीय जनताकाे तर्फबाट औद्योगिक क्षेत्र व्यवस्थापन लि. मुख्य कार्यालय काठमाडौंबाट आएका प्रतिनिधि टोलीलाई भक्तपुर औद्योगिक क्षेत्रबाट भएको ध्वनि र धुँवा फाल्ने नेपो इण्डष्ट्रिज उद्योगबारे संयुक्त निवेदन हस्तान्तरण गरिएकाे थियाे ।

निवेदनमा के छ ?

निवेदनमा भक्तपुर नपाको इँताछेँ, खौमा, ब्यासी, भक्तपुर नगरपालिका कार्यालय, वरपरका जनतासमेत घरमा बस्न नहुने गरी सञ्चालित उद्योगहरुले ध्वनी र धुँवा प्रदूषण फाल्ने नेपो इन्डस्ट्रिज स्वचालित टेक्सटाइल मेसिन अगाडितर्फ २८ थान र पछाडितर्फ १४ थान गरी ४२ थान र डाइङ मेसिन गैरकानुनी ढंगले सञ्चालन गरिरहेको दावी गर्दै नेपाल सरकारको सम्बन्धित निकायबाट प्रमाणित नभएसम्म नेपो इन्डष्ट्रिज बन्द गर्नुपर्ने उल्लेख छ ।

औद्योगिक क्षेत्र व्यवस्थापन लि.ले नेपाल सरकारको आ.व. २०७३÷७४ को बजेट वक्तव्यको प्रतिबद्धताअनुसार भक्तपुर औद्योगिक क्षेत्रबाट ध्वनि र धुँवा प्रदूषण फाल्ने नेपो इण्डष्ट्रिजलगायतलाई काठमाडौंउपत्यका बाहिर स्थानान्तरण गर्नुपर्नेमा त्यसो नगरी हालसम्म चुप बसेका अधिकारीहरुसँग स्पष्टीकरण लिनुपर्ने र जग्गा अधिग्रहणको उद्देश्यअनुसार काम नभएको हुँदा सो जग्गा सम्बन्धित जग्गावालालाई नै फिर्ता गर्नुपर्ने माग राखेको छ ।

औद्योगिक व्यवस्थापन कार्यालयले स्थानीय सरकारबाट अनुमति प्राप्त उद्योगहरुमात्र भक्तपुर औद्योगिक क्षेत्रमा सञ्चालन गर्न अनुमति दिनुपर्ने र अनुमति प्राप्त उद्योगले भक्तपुर नगरपालिकालाई तोकिएबमोजिम कर तिर्नुपर्नेलगायतका बुँदा उक्त निवेदनमा उल्लेख गरिएको छ ।