भक्तपुर १ नपलीस्थित यातायात व्यवस्था सेवा कार्यालय, सल्लाघारीका सम्पूर्ण सेवाहरु बन्द गरिएको छ । आइतवार कार्यालयले एक सूचना जारी गर्दै सबै सेवा बन्द गरेको हो ।

कार्यालय प्रमुख लगायत केहि कर्मचारीमा समेत कोरोना भाइरस संक्रमण पुष्टि भएपछि सेवा बन्द गर्नुपरेको कार्यालयले जनाएको छ । अर्को सूचना जारी नभए सम्म सेवा स्थगित गरिएको सूचनामा भनिएको छ ।

कार्यालय प्रमुख विमल भट्टराई लगायत कर्मचारीहरुको स्वास्थ्य अवस्था सामान्य रहेको थाहा भएको छ । प्रमुख भट्टाराईमा कोभिड १९ का लक्षणसमेत देखिएपछि उनी जिउ दुख्ने र उच्च ज्वरोको सामना गरिरहेका छन् अन्य संक्रमित कर्मचारीमा भने कुनै लक्षण देखिएको छैन ।

प्रमुख भट्टराई होम आइसोलेसनमा रहेका छन् । कार्यालयको माथिल्लो तलामा बस्दै आएका उनी परिवारको रेखदेखमा स्वास्थ्य लाभ गरिरहेका छन् । उनी कोभिडको जोखिममा पनि दैनिक सेवाग्राहीको सेवामा तल्लीन थिए । कार्यालय प्रमुख नै कोभिड १९ संक्रमित बनेपछि दैनिक ७/८ सयको हाराहारीमा सेवा प्राप्त गरिरहेका सेवाग्राही समस्यामा परेका छन् । कार्यालय बन्द भएको थाहा नहुँदा सल्लाघारीबाट पटके कर तिरेर पूर्व जान हिडेका सवारी थप सास्तीमा परेका छन् ।

कार्यालयले संक्रमणमा नपरेका कर्मचारीबाट सेवा सुचारु गर्नुपर्ने स्थानीय अल्बर्ट बज्राचार्य बताउँछन् । कार्यालयमा कम दरबन्दी रहेकाले सेवा सूचारु गर्न नसकिएको एक कर्मचारीले जानकारी गराए ।