बैतडी, ७ मंसिर । भारतसंग सीमा जोडिएको बैतडीको झुलाघाट नाका ५ दिनका लागि खोलिने भएको छ । मंसिर ८ गते सोमबारदेखि मंसिर १२ गते शुक्रबारसम्म नाका खुला हुने सहायक प्रमुख जिल्ला अधिकारी लोकेन्द्रसिंह नेगीले जानकारी दिए । भारतीय पेन्सनधारी नेपाली नागरिकलाई पेन्सन बुझ्नका लागि सजिलो होस भनेर ५ दिनका लागि नाका खोल्ने तयारी भएको उनले बताए ।
नेपाल सरकारको निर्णय, जिल्ला प्रशासन कार्यालय बैतडी र डिएम कार्यालय पिथौरागढको समन्वयमा नाका खोल्ने तयारी भएको सहायक प्रमुख जिल्ला अधिकारी नेगीले जानकारी दिए ।
पेन्सनधारी नागरिकहरुले कोरोनाका कारण सीमा नाका बन्द भएपछि गएको चैतदेखि पेन्सन बुझ्न पाएका छैनन् । पेन्सनधारी नागरिकको समस्यालाई मध्यनजर गरेर नाका खोलिन लागेको जिल्ला प्रशासन कार्यालयले जनाएको छ । नाका खुलेको समयमा पेन्सनधारी नागरिकका साथै अत्यावश्यक र आकस्मिक काम परेकाहरुले समेत आवतजावत गर्न पाउने सहायक प्रमुख जिल्ला अधिकारी नेगीले जानकारी दिए ।
बैतडीमा १२ सय बढी भारतीय पेन्सनधारी नागरिक रहेका छन् । ५ दिनभित्र पेन्सन बुझ्नका लागि नाका खोलिन लागेको हो । नाकामा पेन्सनधारीहरुले आवतजावत गर्दा स्वास्थ्य सुरक्षा सतर्कताका सबै मापदण्ड परिपालना गर्नुपर्ने पनि सहायक प्रमुख जिल्ला अधिकारी नेगीले जानकारी दिए ।
गत २०७६ चैत महिनामै नाकाबन्दी भएपछि पेन्सन बुझ्न नपाएका भारतिय पेन्सनधारीहरुलाई दैनिक छाक टार्नै समस्या भ्एको छ । सुर्नया २ का हरिजितसिंह पाण्डेले भने ‘हामीलाई पेन्सन बुझ्न नपाउदाँ निकै समस्या भएको छ । पेन्सन नबुझेको ९ महिना भयो, यदि ११महिना सम्म झुलाघाटबाट पेन्सन ल्याउन नसकेमा हामीले इलाबाद जानुपर्छ, उता फेरी धेरै कागजात पु¥याउनुपर्छ, हामी सबै बृद्ध मान्छे छौँ, समस्या हुन्छ, तर अहिले नाका खुल्ने खबर पाउदाँ खुसि भएका छौँ ।’
विगतमा भारतमै काम गरेका पेन्सनधारीले पाउदैँ आएको जेष्ठ नागरिक भत्ता समेत सरकारले कटौती गरेको हुदाँ झन समस्या भएको दशरथचन्द नगरपालिका ६का अविषेक जोसीले बताए ।
बिगतमा भारतिय पेन्सनधारीले नेपालबाट बृद्धभत्ता समेत पाउदैँ आएकोमा अहिले त्यो पनि कटौती हुदाँ आफुहरुले नाकाबन्दीको समयमा चाडपर्वमा समेत बेखर्ची बस्नुपरेको उनले बताए । भारतिय पेन्सन बुझ्नका लागी नेपालमै कुनै बैंक स्थापना गरिदिन भारतीय पेन्सनधारीहरुको माग छ । बैंक स्थापनाका लागी समेत पहल भैरहेको बैतडीका सहायक प्रमुख जिल्ला अधिकारी जेगीले बताए ।
यो समाचार आजको राजधानी दैनिकमा सीपी लोहियाले लेखेका छन् ।