भक्तपुरमा दुई पाकेटमार रंगेहात पक्राउ परेका छन् । पकेटमारीको पैसा सहित उनीहरुलाई भक्तपुर प्रहरीले पक्राउ गरेको हो ।

बिहीवार मध्यपुर ठिमी नगरपालिका वडा नं.३ गठ्ठाघर स्थित बस स्टपमा गठ्ठाघरबाट माइक्रोबस चढी रत्नपार्क जाने क्रममा एक यात्रीको पकेट मारिएको थियो । नगद रु ५० हजार पकेटमारी भएको भन्ने थाहा पाई गठ्ठाघर बस्ने बर्ष २९ को यमनाथ पौडेलले महानगरीय प्रहरी परिसर, भक्तपुरको कन्ट्रोल नम्बर १००मा जानकारी दिएका थिए । सूचना प्राप्त हुनासाथ पकेटमारी गर्ने व्यक्तिहरुलाई खोजतलास गर्दा दुई जनालाई नगद ५० हजार सहित पक्राउ गरिएको प्रहरीले जनाएको छ ।

प्रहरी नायब निरीक्षक प्रकाश बगालेको कमाण्डमा खटिएको प्रहरी टोलीले कौशलटार बस स्टपबाट नियन्त्रणमा लिई तलासी
गर्दा पकेटमारी भएको रकम रु. ५० हजार) सन्तोष लामाको साथबाट बरामद भएको र उक्त कार्यमा विकास राजबंशीले सहयोग गरेको खुल्न आएको डिएसपी दिपक गिरीले जानकारी दिए । विकास राजबंशी र सन्तोष लामा दुवैजना मिली पकेट मारेको सोधपुछको क्रममा पत्ता लागेपछि दुबैजनालाइ पक्राउ गरी नियन्त्रणमा राखिएको बताइएको छ । उनीहरुलाई कानुन बमोजिम नियन्त्रणमा लिई चोरीको कसुर अनुसार थप अनुसन्धान तथा कारवाही भईरहेको प्रहरीको भनाइ छ ।