भक्तपुर, २१ मङ्सिर भक्तपुरमा २ जना चोरीको मोटरसाइकलसहित पक्राउ परेका छन् । कौशलटार चोकमा ड्युटीमा खटिएको प्रहरी टोलीले चेकजाँच गर्ने क्रममा उनीहरुलाई पक्राउ गरेको हो ।
पक्राउ पर्नेमा दोलखा घर भई हाल सूर्यविनायक बस्ने बर्ष १९ को संगित तामाङ र दोलखाकै सैलुङ गा.पा. २ घर भई हाल गठ्ठाघर बस्ने बर्ष १९ को सलिन तामाङ रहेका छन् ।
मध्यपुर ठिमी न.पा. ३ कौशलटार स्थित कमलधाराबाट प्रदेश ३-०२-०१७ प. ७६७७ नं.को २२० सि.सि. को पल्सर मोटरसाइकल चोरी भएको भन्ने सूचनाको आधारमा कौशलटार चोकमा ड्युटीमा खटिएको प्रहरी टोलीले चेकजाँच गर्ने क्रममा उनीहरुलाई गएराती करिब १ बजे पक्राउ गरेको प्रहरीले पुष्टि गरेको छ । डिएसपी दिपक गिरीका अनुसार चेकजाँच गर्ने क्रममा संगित तामाङले शंकास्पद हर्कत गरेकोले नियन्त्रणमा लिई महानगरीय प्रहरी वृत्त ठिमीमा ल्याई अनुसन्धान गर्ने क्रममा केरकार गर्दा उक्त नम्बरको मोटरसाइकल सलिन तामाङसमेतको मिलेमतोमा चोरी गरी लगेको र सलिन संग भएको संगीतले स्वीकार गरेका थिए ।
संगीतको बयाँनपछि सलिनलाइ बिहान पक्राउ गरिएको थियो । महानगरीय प्रहरी वृत्त ठिमीबाट खटिएको अनुसन्धान अधिकृत सहितको प्रहरी टोलीले आइतवार विहान ०९:३० बजेको समयमा कौशलटारबाट उक्त नं. को मोटरसाइकल सहित सलिनलाई नियन्त्रणमा लिईएको बताइएको छ । पक्राउ परेका दुबैजना उपर चोरी मुद्धामा थप अनुसन्धान र कारवाही अघि बढेको डिएसपी दिपक गिरीले जानकारी दिए । पछिल्लो समय भक्तपुरमा मोटरसाइकल चोरीको बिगबिगी रहेको छ । दैनिकजसाे मोटरसाइकल हराएकाे रिपाेर्ट लिएर मानिसहरु आइरहेका एक प्रहरी अधिकृतले जानकारी गराएका छन् ।