७२ औं अन्तर्राष्ट्रिय मानव अधिकार दिवस (१० डिसेम्वर) को उपलक्ष्यमा नेपाल मानव अधिकार संगठन जिल्ला शाखा भक्तपुरले दीप प्रज्वलन कार्यक्रमा सम्पन्न गरेको हो ।

कोरोनावाट मुक्ति, शान्ति, सामाजिक सद्भाव र राजनीतिक स्थिरताको कामना गर्दै मानव अधिकारवादीहरुको सहभागीतामा टौमढीस्थित न्यातापोल मन्दिर प्राङ्गणमा दीप प्रज्वलन कार्यक्रम गरिएको शाखाका सभापति रामकृष्ण मानन्धरले बताए ।

सभापति रामकृष्ण मानन्धरको सभापतित्वमा सम्पन्न उक्त कार्यक्रममा शाखाका संस्थापक अध्यक्ष एवं सल्लाहकार श्री योगेन्द्रमान बिजुक्छेँ र पूर्व सभापति तथा सल्लाहकार श्री विश्वमोहन जोशीको आतिथ्यता एवं जिल्लाका मानवअधिकारकर्मीहरूको सहभागिता रहेको थियो ।

‘पुन:प्राप्त गर र मानवअधिकारका लागि खडा होउ’ भन्ने नाराका साथ ७२ औं अन्तर्राष्ट्रिय मानव अधिकार दिवस देशभर मनाइँएको र भक्तपुरमा दीप प्रज्वलन सहित यो दिवस सम्पन्न भएकाे हाे ।

सन् १९४८ डिसेम्बर १० मा विश्वव्यापी मानवअधिकार घोषणापत्र जारी भएको दिनलाई अन्तर्राष्ट्रिय मानवअधिकार दिवसको रूपमा प्रत्येक वर्ष मनाउने गरिन्छ । कोरोना संक्रमण जोखिमका कारण राष्ट्रसंघले मानव अधिकारलाई केन्द्रमा राखेर पहिलेकै अवस्थामा फर्कन विश्व केन्द्रित हुनुपर्नेमा जोड दिएको छ ।